Имрӯз, 1 апрел Вилояти Мухтори Кӯҳистони Бадахшон чун анъана аз иҷрои нақшаи даъвати ҷавонписарон ба сафи Қувваҳои Мусаллаҳи Ҷумҳурии Тоҷикистон гузориш дод.

Чорабинии гусели навдаъватшудагон бо баргузории роҳпаймоии оммавӣ аз назди Варзишгоҳи марказӣ то майдончаи варзишии маҳаллаи Н. Хусрави шаҳри Хоруғ оғоз гардид.

Дар роҳпайпоӣ роҳбарияти вилоят, роҳбарон ва кормандони идораю муассисаҳои вилоятию шаҳрӣ, намояндагони сохторҳои гуногун, мақомоти ҳифзи ҳуқуқ, собиқадорон, ҷавонон ва донишҷӯён иштирок намуданд.

Зимни суханронӣ, раиси вилоят Мирзонабот Алишер Худобердӣ зикр кард, ки аз соли 2018 инҷониб ВМКБ яке аз аввалинҳо шуда, нақшаи даъват ба сафи Қувваҳои Мусаллаҳро дар рӯзи аввал иҷро менамояд ва омиле, ки ба комёбиямон дар ин маврид мусоидат менамояд, ин пеш аз ҳама, сиёсати ватанпарваронаи Пешвои миллат муҳтарам Эмомалӣ Раҳмон мебошад. Маҳз тавассути фаъолияти хастанопазири Роҳбари давлат, дар тули 34 соли Истиқлол Қувваҳои Мусаллаҳи Ҷумҳурии Тоҷикистон ба як рукни устувори давлатдорӣ, сипари муътамад ва муҳофизи воқеии дастовардҳои тарихию музаффариятҳои беназири замони соҳибистиқлолии миллат табдил ёфтанд.

Таъкид шуд, ки насли ҷавон дар заминаи омӯзиши таърихи пурғановати худ, амиқан дарк менамояд, ки дар ҷаҳони пуртазоди имрӯза, дар қатори таҳкими ваҳдати миллӣ ва ҳамгироии мустаҳками иҷтимоӣ, иқтидори мудофиавии кишвар бояд тавоно ва муқтадир бошад. Аз ин лиҳоз, ҷавонони мо бо майлу хоҳиши худ, бо дарки рисолати инсонӣ ва уҳдадории шаҳрвандияшон аз тамоми шаҳру ноҳияҳои вилояту ҷумҳурӣ ва аз хориҷи кишвар бо гирифтани даъватнома ба комиссариатҳои ҳарбӣ ҳозир мешаванд.

Дар фарҷом, раиси вилоят ба даъватшавандагон дар анҷом додани рисолати таърихияшон, яъне адои қарзи фарзандӣ дар назди Модар-Ватан мувафаққият ва комёбӣ таманно карда, ба волидайн ва наздикони онҳо, ҳайати комиссияҳои даъватӣ, масъулини комиссариатҳо, сохторҳои ҳифзи ҳуқууқ ва амният, МИҲД шаҳру ноҳияҳои вилоят, ҳамчунин, аҳли ҷамоатчигӣ барои зоҳир намудани масъулияти баланд зимни муташаккилона ташкил намудани маъракаи даъват ба сафи Қувваҳои Мусаллаҳи Ҷумҳурии Тоҷикистон изҳори сипос намуд.

Сипас, аз ҷониби аҳли фарҳанги вилоят барномаи рангини консертӣ манзури ҳозирин гардида, навдаъватшудагон бо иҷрои маросими нонгазон зери навои суруду мусиқӣ ба сафи Қувваҳои Мусаллаҳ гусел карда шуданд.

Садоншо ҶАНОБИЛШОЕВ, “ҶТ”