Мирзонабот Алишер Худобердӣ, раиси ВМКБ зимни нишасти матбуотӣ зикр кард, ки тибқи дастури Пешвои миллат муҳтарам Эмомалӣ Раҳмон зимни ифтитоҳи Варзишгоҳи марказӣ дар ноҳияи Ишкошим бояд дар ҳар як шаҳру ноҳия лигаҳои футболи занонаю мардона таъсис дода шаванд ва дар ин самт корҳои зиёде анҷом дода шуданд.

- Мо минбаъд барои рушди футбол диққати зарурӣ равона менамоем ва дар заминаи иҷрои дастури Президенти Ассотсиатсияи футболи Осиёи Марказӣ, Президенти Федератсияи футболи Тоҷикистон муҳтарам Рустами Эмомалӣ ҷиҳати таъсиси Академияи футбол аллакай чораҳои муассир андешида шуда истодаанд ва он дар рушди ҳамаҷонибаи футбол мусоидати ҳамаҷониба мекунад, - иброз дошт раиси вилоят.

Таъкид гардид, ки чорабинии муҳимтарин ин ташрифи навбатӣ ва таърихии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳру ноҳияҳои вилоят мебошад, ки дар сатҳи баланди сиёсию ташкилӣ ва маърифатию фарҳангӣ баргузор гардид. Бо ҳузури мубораки Роҳбари давлат ва дар доираи сафар зиёда аз 100 объекти таъиноти гуногун ифтитоҳ гардида, санги асос дар бунёди 5 объекти муҳими дигар гузоша шуд.

Гуфта шуд, дар шаҳру ноҳияҳои вилоят 43 корхона ва коргоҳҳои саноатӣ, бо таъсиси 235 ҷойи нави корӣ мавриди истифода қарор дода шуда, соли ҷорӣ бошад, тасмим гирифта шудааст, ки боз 50 объекти дигари соҳа, бо таъсиси зиёда аз 700 ҷойҳои нави корӣ бунёд гарданд. Ин аст, ки маҷмуи маҳсулоти саноатӣ ба 307,2 млн сомонӣ баробар гардид, ки ин нисбати соли 2023 50,2 фоиз зиёдтар мебошад.

Зимнан раиси ВМКБ Мирзонабот Алишер Худобердӣ дастоварҳои соҳаҳои иҷтимоию фарҳангиро натиҷабахш арзёбӣ карда, таъкид намуданд, ки дар заминаи ҳамаи ин ва дигар комёбиҳо, махсусан, рушди инфрасохтори хизматрасонӣ, теъдоди сайёҳон, ки аз вилоят дидан намуданд, ба 37 820 нафар расид ва ин нишондод нисбати соли гузашта 1,8 маротиба зиёд аст.

Дар қатори ҷалби ҳар чӣ бештари ҷавонон ба корҳои давлатию созандагӣ, 6 толор ва 18 майдончаи варзишӣ бунёд ёфтанд. Варзишгарони вилоят дар мусобиқаҳои ҷумҳуриявӣ ва байналмилалӣ иштирок намуда, дар умум 453 медал ба даст оварданд, ки аз онҳо 87 медали тилло мебошад. Дар маркази маъмурии вилоят теъдоди зиёди чорабиниҳои ҷумҳуриявӣ, аз он ҷумла Чемпионати Тоҷикистон оид ба боксу дзюдо, волейболу теквандо баргузор шуда, тими яккачини вилоят оид ба футбол таъсис ёфта, бозиҳои рафиқонаро дар вилоят ва берун аз он барпо намуданд.

Садоншо ҶАНОБИЛШОЕВ, “ҶТ”