18 – уми январ дар асоси нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳайати кормандони сохтори марказии Кумита ва омӯзгорону донишҷӯёни Донишкадаи тарбияи ҷисмонии Тоҷикистон ба номи С. Раҳимов таҳти роҳбарии раиси Кумита дар талу теппаҳои мавзеи Муассисаи давлатии “Боғи Ғалаба ва нигоҳдории ҷангал” таҳти унвони “Ҷавонон - ҳомии сарсабзии табиати Тоҷикистон” маъракаи ниҳолшинонӣ доир намуданд.

Дар ин бора маркази таҳлил ва иттилооти Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар додааст.

Бино ба иттилои манбаъ, маъракаи ниҳолшинонӣ дар такя ба ташаббусҳои созандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба сарсабзу хуррамгардонии ҳар гӯшаи Тоҷикистони офтобӣ гузаронида шуда, зимни он роҳбарият, ҳайати кормандони сохтор ва зерсохтори Кумита ва донишҷӯёни сохторҳои варзишии Кумита, дар умум зиёда аз 200 нафар фаъолона иштирок намуданд.

Тибқи иттилоъ, то нисфирӯзӣ дар ҳудуди Муассисаи давлатии “Боғи Ғалаба ва нигоҳдории ҷангал” зиёда аз 1000 бех ниҳоли сояафкан шинонида шуд.

Ёдовар мешавем, ки дар мамлакат “Барномаи миллии Ҷумҳурии Тоҷикистон “Мамлакати сабз” барои солҳои 2023-2027” қабул гардидааст, ки дар асоси он то соли 2026 дар Тоҷикистон дар масоҳати чор ҳазор гектар 135 миллион бех дарахту буттаҳо, аз ҷумла дарахтони мевадиҳанда, хуч ва санавбар шинонида мешавад.

“ҶТ”