3 июн дар толори Консерваторияи миллии Тоҷикистон ба номи Талабхӯҷа Сатторов чорабинии фарҳангӣ бахшида ба ҷамъбасти Моҳвораи ҷавонон таҳти унвони “Тоҷикистон - зодгоҳи орзуҳои ҷавонӣ” баргузор гардид.

Дар чорабинӣ раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода, директори Консерваторияи миллии Тоҷикистон Баҳодур Давлатзода, устодон, донишҷӯён ва намояндагони соҳаи фарҳанг иштирок намуданд.
Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни суханронии худ иброз дошт, ки имрӯз ҷавонони соҳибистеъдоди кишвар бо ҳунару маҳорати баланди худ на танҳо дар дохили мамлакат, балки дар арсаи байналмилалӣ фарҳанг, мусиқӣ ва санъати миллии тоҷикро муаррифӣ менамоянд. Дастовардҳои ҷавонон натиҷаи сиёсати фарҳангпарваронаи давлат ва заҳматҳои пайвастаи муассисаҳои фарҳангӣ, аз ҷумла Консерваторияи миллии Тоҷикистон мебошад.
Раиси Кумита ҳамчунин таъкид кард, ки ҳамкории Кумитаи кор бо ҷавонон ва варзиш бо Консерваторияи миллии Тоҷикистон ва Вазорати фарҳанги Ҷумҳурии Тоҷикистон дар сатҳи баланд ба роҳ монда шуда, барои рушди истеъдоди ҷавонон ва тарғиби фарҳанги миллӣ мусоидат менамояд.
- Имрӯз фазои кишвар саршор аз суруду мусиқӣ, шодиву нишот ва тантанаҳои фарҳангӣ буда, ин ҳама самараи сулҳу субот ва сиёсати фарҳангдӯстонаи Роҳбарияти давлат мебошад. Фарҳанги тоҷик бо таърихи куҳан ва тамаддуни ғании худ ҷойгоҳи хос дошта, ҷавонон бояд барои муаррифии шоистаи он дар арсаи ҷаҳонӣ саҳмгузор бошанд, - иброз дошт раиси Кумита.
Дар идома як қатор ҷавонони фаъол барои саҳми назаррас дар рушди санъати миллӣ бо медали “Шуҷоат ва ҷавонмардӣ”, ифтихорнома ва сипосномаҳо қадрдонӣ шуданд.
Дар фарҷом барномаи рангини фарҳангӣ манзури ҳозирин гардонида шуда, дар рафти он сурудҳои ватандӯстона ва тараннумгари Истиқлоли давлатӣ сароида шуд.

М. МУҚАДДАМОВА, “ҶТ”