Таҳти чунин унвон имрӯз дар маркази маъмурии Вилояти Мухтори Кӯҳистони Бадахшон – шаҳри Хоруғ аксияи иттилоотию таблиғотӣ бо баргузории роҳпаймоии оммавӣ бахшида ба Рӯзи Конститутсияи Ҷумҳурии Тоҷикистон ва 30 – солагии таъсисёбии Ҳизби Халқии Демократии Тоҷикистон доир гардид.

Чорабинӣ бо ибтикори Кумитаи иҷроияи марказии Ҳизби Халқии Демократии Тоҷикистон дар якҷоягӣ бо ТҶҶ “Созандагони Ватан”, КИ ҲХДТ дар ВМКБ баргузор шуд.

Нахуст, дар назди Театри мусиқию мазҳакавии ба номи М. Назарови шаҳри Хоруғ ба иштирокчиёни аксия нишонаҳои сарисинагӣ ва варақаҳои таблиқотии “Тоҷикистон бо Пешвои миллат – ба пеш!” тақсим карда шуд.

Сипас, беш аз 2000 нафар ҳизбиён, аъзои намояндагии ТҶҶ “Созандагони Ватан”, ҷавонон бо шиору овезаҳои ватандӯстона, Парчаму дигар муқаддасоти миллӣ аз назди бинои Театри мусиқию мазҳакавии ба номи М.Назаров то майдони Исмоили Сомонӣ роҳ паймуданд.

Дар қисмати ҳамоиши тантанавӣ роҳбарияти вилоят Мирзонабот Алишер Худобердӣ, муовини раиси ҲХДТ Мавлон Хайринисо Юсуфӣ сухаронӣ намуданд.

Зикр гардид, ки ташрифи навбатии таърихии Пешвои миллат, Роҳбари мушфиқи давлат, Ҷаноби Олӣ муҳтарам Эмомалӣ Раҳмон, ки то ҳол сокинони вилоят ва умуман мардуми шарифи Тоҷикистон таҳти таассуроти амиқи он қарор доранд, бори дигар собит сохт, ки чӣ қадар халқ нисбати Пешвои миллат эҳтирому муҳаббати бузург дошта, Сарвари давлат бошанд, дар нисбати халқ чӣ андоза ғамхору меҳрубон ҳастанд.

Хурду бузурги вилоят бори дигар эҳсоси амиқ аз он намуданд, ки Пешвои миллат ба қавлу савганди хеш содиқу вафодор буда, бо заҳмати шабонарӯзӣ ва хизмати хастанопазирашон тамоми ҳастӣ ва ҳаёташонро ба Ватану миллат бахшидаанд.

Гуфта шуд, ки фазои имрӯзаи сулҳу субот, ваҳдати комили миллӣ, волоияти қонун, раванди бесобиқаи бунёдкорӣ ва ҳамгироии ҳамаҷонибаи тамоми қишрҳои ҷомеа ба ном ва фаъолияти Пешвои миллат муҳтарам Эмомалӣ Раҳмон марбут мебошанд.

Аз ин рӯ, моро зарур аст, ки тамоми неру, дониш, таҷриба ва касбияти худро ба ҳам оварда, китф ба китф монда, дар роҳи амалӣ сохтани дастуру ҳидоятҳои Роҳбари давлат аҳлона меҳнат намуда, Ватани маҳбубамонро боз ҳам пешрафта намоем.
Чорабиниро барномаи рангини консертии омоданамудаи аҳли фарҳанги вилоят ҳусни анҷом бахшид.

Садоншо ҶАНОБИЛШОЕВ, “ҶТ”