Тайи чанд соли охир дар кишвар озмунҳои ҷумҳуриявӣ гузаронида шуда истодаанд, ки ин ҳама бо ташаббус ва ғамхориҳои бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад. Ин ҳама бенатиҷа набуда, имрӯзҳо шумораи дӯстдорони китоб дар ҳоли афзоиш аст.

Парвона Аҳмедова яке аз чунин нафаронест, ки меҳри беандоза нисбати китоб ӯро ба Озмуни ҷумҳуриявии “Фурӯғи субҳи доноӣ китоб аст” бурд. Ӯ аз хурдӣ ба хондани китоб ва аз бар кардани достону ҳикояҳо шавқи зиёд дошт, чун мехост дар оянда барои худ касе шуда бошад. Волидон ҳамеша ӯро барои хондану дар зиндагӣ роҳи дурустро пайдо кардан, талқин мекарданд.
Ин буд, ки ҳанӯз замони дар синфи 5 таҳсил карданаш бо роҳнамоии волидон тасмим гирифт, дар Озмуни ҷумҳуриявии “Фурӯғи субҳи доноӣ китоб аст” иштирок кунад ва роҳи худро барои ноил гаштан ба муваффақиятҳо боз намояд.

Соли аввали иштирок ӯ ҳаяҷони зиёде дошт, вале ба ин нигоҳ накарда, қадами нахустини худро дар ин ҷода бардошт ва худро дар саҳнаи бузург санҷид. Соли дуюм аллакай ӯ худро озод ҳис мекард ва тавонист, то ба даври ҷумҳуриявӣ роҳ ёбад. Аммо соли сеюми иштирок ӯ куллан барои мубориза омода буд ва тавонист, то ба даври ҷумҳуриявии ин озмуни бонуфуз роҳ ёфта, сазовори ҷойи ифтихорӣ гардад.

Парвона ҳанӯз хонандаи мактаб аст ва аллакай се сол боз дар ин озмуни бонуфуз аз рӯйи номинатсияи “Адабиёти бачагона” ширкат меварзад. Имсол ӯ тавонист, то даври ҷумҳуриявии озмуни “Фурӯғ...” роҳ ёбад ва сазовори ҷойи ифтихорӣ гардад, вале ӯ ҳанӯз руҳафтода нест. Бу гуфтаи ӯ то ба даври ниҳоӣ рафтан барояш худ дастоварди бузургест.

- Ғолиб нашудан маро руҳафтода намекунад, балки баръакс, маро ташвиқ мекунад, ки бештар кӯшиш кунам ва дар оянда натиҷаҳои беҳтар ба даст орам, - мегӯяд Парвона.

Ба андешаи ӯ озмуни “Фурӯғ...” боис гардид, ки бештар ба илму дониш рӯ биёрад ва чизҳои зиёдеро дар доираи ин озмун аз худ намояд.

- Ман аз ин озмун сараввал илм омӯхтам ва донишамро зиёд кардам. Ин озмун ба мо, наврасону ҷавонон имконият медиҳад, ки бештар ба китобхонӣ машғул шуда, донишамонро боз ҳам сайқал диҳем, - иброз дошт Парвона.

Ӯ дар ин муддат тавонист, аз рӯи низомномаи озмун аз осори шифоҳӣ 250 афсона, 250 зарбулмасалу мақолҳо, 200 латифа, 150 чистон, 100 тезгӯяк, 400 осори насрӣ ва 8000 мисраъ осори наз-миро аз худ намояд ва донишу малакаҳои худро сайқал диҳад.

Ин дурдонаи боғи маърифат дар даврҳои ноҳиявӣ ва вилоятӣ ҷойҳои намоёнро сазовор гаштааст ва аз ин ки ғолиби даври ҷумҳуриявӣ нагардид, руҳафтода нест. Ӯ ният дорад, ки солҳои минбаъда бо тайёрии ҷиддитар иштирок намуда, натиҷаҳои беҳтарро ба даст орад.

Ӯ ҳамзамон баён дошт, ки “Ман ба холҳои худ розӣ ҳастам, зеро онҳоро бо заҳмат ва талош ба даст овардам. Бо вуҷуди ин, медонам, ки ҳамеша ҷойи беҳтар шудан ҳаст ва ман барои дар оянда беҳтар кор кардан талош мекунам”.

Озмун шартҳои гуногун дошт ва барои ӯ саволҳои доварон осон ва фаҳмо буданд. Парвона аз ҳама бештар ифтихорманд аз он аст, ки ин озмун дар дили ӯ меҳри китобхониро афзудааст, яъне ӯро китобдӯст кардааст. Ӯ мегӯяд, мутолиаи зиёд дар ӯ малакаи суханварӣ, ташаккулёбии ҷаҳонбинӣ ва қобилияти фикррониро афзудаст.

Парвона ҳамаи пирӯзиҳои худро маҳз аз дастгириҳои бевоситаи волидон ва омӯзгорони худ медонад, чун ташвиқи онҳо боис гардид, ки ӯ дар озмуни мазкур ширкат кунаду дар даври вилоятӣ сазовори ҷойи намоён гардад.

Ин ғунчаи навшукуфтаи боғи дониш мехоҳад дар оянда дар самти иқтисод ва молия таҳсил кунад ва бовар дорад, ки бо донишу малакаи худ дар рушди иқтисоди кишвар, заррае ҳам бошад, саҳми худро мегузорад.

Сафиаллоҳ ИБОДЗОДА,
коромӯзи “ҶТ”