Имрӯз дар толори Донишгоҳи давлатии Хуҷанд ба номи академик Бобоҷон Ғафуров таҳти унвони “Тарбияи ватандӯстии ҷавонон – омили таҳкими пояҳои давлатдории миллӣ” ҳамоиш доир гардид.

Тибқи иттилоъ, чорабинӣ дар доираи татбиқи сиёсати давлатии ҷавонон ва тақвияти ҳисси ватандӯстии ҷавонон бо усули “факултет ба факултет” ва “курс ба курс” ба роҳ монда шуда, дар он Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Исмоилзода Зуфар, муовини раиси вилояти Суғд, Исматзода Бахтиёр, сардори Раёсати кор бо ҷавонон ва варзиши вилоят ва Набизода Мирзотоҳир, ректори Донишгоҳи давлатии Хуҷанд ба номи академик Бобоҷон Ғафуров иштирок ва суханронӣ намуданд.

Зимни суханронӣ таъкид гардид, ки нақши ҷавонон дар таҳкими Истиқлол, суботу амният ва рушди иҷтимоиву иқтисодӣ басо муҳим аст. Иштирокчиён иброз доштанд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷавононро ҳамчун қувваи асосии созанда ва такягоҳи давлату миллат мешиносанд ва ҳамеша дастгирӣ мекунанд.

“ҶТ”