Бо мақсади шарҳу тафсири тағйиротҳо ба Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” намояндагони Ҳукумати кишвар бо сокинони ҷамоатҳои деҳоти “Қурбоншоҳ Гадолиев”, “Тӯсиён”, “Мирсаид Миршакар” ва “Роштқалъа”–и ноҳияи Роштқалъа суҳбату вохӯриҳо доир намуданд.

Дар мулоқот муовини раиси Маҷлиси намояндагони Маҷлиси Олии Ҷумҳурии Тоҷикистон Акрамшо Феълалиев, котиби ҳамоҳангсози Шӯрои ҷамъиятии мамлакат Нуралӣ Саидов, намояндаи Кумитаи оид ба корҳои дин, танзими анъана ва ҷашну маросимҳои миллии назди Ҳукумати ҷумҳурӣ, мудири Бахши кор бо ҷавонон ва варзиши ноҳияи Роштқалъа Зӯҳро Муллоҳукматова ширкат варзида, перомуни тағйиру иловаҳои воридгардида ба қонуни мазкур бо сокинон суҳбат намуданд.

Қайд гардид, ки анъанаву ҷашн ва маросимҳои миллӣ омили асосии ҳаёти иҷтимоӣ буда, ба низоми муайян даровардани онҳо беҳбудиро тақозо мекард. Зеро солҳои охир баъзе аз шаҳрвандони кишвар дар вақти баргузории тӯйю маъракаҳо ба тақлидкорӣ ва исрофкориҳои зиёд роҳ медоданд.

Баъди суҳбату вохӯриҳо сокинони ноҳияи Роштқалъа ҷонибдории хешро ба тағйиру иловаҳо ба Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” иброз дошта таъкид намуданд, ки талаботи қонуни миллиро сарфи назар нахоҳанд кард.

Машҳур ИМОМНАЗАРОВ, “ҶТ”