Дар Кохи фарҳанги ба номи Абӯабдуллоҳи Рӯдакии вилояти Суғд ба муносибати Рӯзи Қувваҳои Мусаллаҳи Ҷумҳурии Тоҷикистон ҷамъомади тантанавӣ доир шуд.

Дар ин бора хадамоти матбуоти раиси вилояти Суғд хабар медиҳад.

Бино ба иттилои манбаъ, Раҷаббой Аҳмадзода - раиси вилояти Суғд зимни суханронӣ аз номи Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи мамлакат муҳтарам Эмомалӣ Раҳмон тамоми хизматчиёни ҳарбӣ ва кулли мардуми вилоятро ба муносибати 32-юмин солгарди таъсисёбии Қувваҳои Мусаллаҳ табрик намуд.

Қайд карда шуд, ки муҳимтарин ва арзишмандтарин меъёри ватандориву ватандӯстӣ, расидан ба қадри Ватан, миллат ва давлати соҳибистиқлол - ин ба ҷо овардани хизмати Ватан ва ҳифзи марзу буми он ба ҳисоб меравад.

Агар ба таърихи Қувваҳои Мусаллаҳи Тоҷикистон, ки зодаи даврони Истиқлол ва яке аз дастовардҳои муҳимтарини он ба ҳисоб меравад, таваҷҷуҳ намоем, равшан мегардад, ки он ҳамагӣ баъди якуним соли ба даст овардани Истиқлоли давлатӣ - дар шароити ниҳоят ҳассоси таърихӣ, ки бақои давлати мустақили тоҷикон таҳти хатари ҷиддӣ қарор дошт, таъсис ёфтааст.
Афсарону сарбозони Қувваҳои Мусаллаҳи Ҷумҳурии Тоҷикистон аз он рӯзҳои вазнин сар карда, дар барқарор кардани сохти конститутсионӣ ва ҳокимияти қонунӣ, мубориза бар зидди дастаҳои мусаллаҳи ҷинояткор, ошӯбҳои хиёнаткорона, кӯшишҳои табаддулоти ҳарбии хоинони миллат ва ҳифзи сарҳади давлатӣ хизмати фидокоронаро анҷом дода, аз имтиҳони ҷиддии ҳаёт гузаштанд.

Тазаккур дода шуд, ки сокинони Тоҷикистони соҳибистиқлол имрӯз аз он ифтихор доранд, ки Қувваҳои Мусаллаҳи Ҷумҳурии Тоҷикистон манфиатҳои давлати соҳибистиқлоламонро сарбаландона ҳимоя менамоянд ва халқи шарифи кишвар таҳти ҳимояи ин неруи қудратманд ҳаёти хурраму осоишта доранд.

Дар охир аз ҷониби аҳли фарҳанги вилоят барномаи рангини консертӣ пешниҳоди иштирокчиён гардонида шуд.