КВД “Тоҷиксуғурта” барои пардохти ғайринақдии суғурташавандагон шартномаи ҳамкориро бо ҶСК “ Бонки Эсхата” ба роҳ мондааст.

Дар ин бора Шуҳрат Мақсудзода, директори ҶСК “Тоҷиксуғурта” зимни нишасти хабарӣ ба рӯзноманигорон иттилоъ дод.

- Ҷиҳати вусъат додани ҳисоббароркунии ғайринақдӣ дар фаъолияти корхона ва фароҳам овардани шароити мусоид барои суғурташавандагон ҷиҳати ғайринақдӣ, корхона бо ҶСК “Бонки Эсхата” шартномаи замимаи “Эсхата онлайн”-ро ба роҳ монд, - гуфт ӯ.

Инчунин, ӯ зикр кард, ки барои истифодаи хизматрасонии дигар бонкҳо QR- рамзи ягонаи корхона ва филиалҳои маҳаллӣ ба истифода дода шудааст.

Ҳамзамон, номбурда илова намуд, ки мутобиқи талаботи моддаи 25 Қонуни Ҷумҳурии Тоҷикистон “Дар бораи фаъолияти суғуртавӣ” аз 2 январи соли 2025, таҳти рақами 2132, ки масъалаи пурра ғайринақдӣ анҷом додани қабули мукофотҳои суғуртавӣ, пардохти суғуртавӣ ва ҷуброни суғуртавиро аз ҷониби ташкилотҳои суғуртавӣ дар бар мегирад, дар корхона воҳидҳои сохтории қабули ҳаққи суғуртавӣ ва амалишавии пардохту ҷубронҳои суғуртавӣ ғайринақдӣ амалӣ мешавад.

Ф. УМАРАЛӢ, “ҶТ”