Дар Кохи фарҳанги ба номи Абӯабдуллоҳи Рӯдакии шаҳри Хуҷанд ба муносибати 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон ҳамоиши бошукӯҳи идона баргузор гардид.

Раиси вилояти Суғд Раҷаб Аҳмадзода иштирокдорони чорабинӣ, ҳайати фармондеҳӣ ва кулли хизматчиёни ҳарбиро ба муносибати 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон табрик намуда, аз нақши Артиши миллӣ дар таҳкими пояҳои давлатдорӣ ва ҳифзи дастовардҳои истиқлолияти давлатӣ ёдовар шуд.

Таъкид гардид, ки ҳайати шахсии Қувваҳои Мусаллаҳи Ҷумҳурии Тоҷикистон таҳти роҳбарии хирадмандона ва дурбинонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар тули солҳои соҳибистиқлолӣ рисолати муқаддаси худ – ҳифзи истиқлолу озодӣ, ҳимояи марзу буми кишвар, таъмини амнияти давлат ва ҷомеа, сулҳу субот ва оромии сиёсиро содиқона иҷро намуда истодаанд.

Бо ёдоварӣ аз вазъи мураккаби ҷаҳони муосир, шиддат гирифтани рақобатҳои геосиёсӣ ва таҳдидҳои нав ба амнияти байналмилалӣ, зарурати ҳифзи сулҳу суботи пойдор ва таҳкими якпорчагии давлатӣ таъкид гардид ва бовар карда шуд, ки афсарону сарбозони шуҷоъ маъракаи муҳими сиёсӣ – 35-умин солгарди Истиқлоли давлатии Ҷумҳурии Тоҷикистонро бо дастовардҳои арзанда истиқбол мегиранд.

Дар фарҷоми чорабинӣ ба як қатор роҳбарони мақомоти ҳифзи ҳуқуқ, афсарону сарбозони фаъол Сипосномаи мақомоти иҷроияи ҳокимияти давлатии вилоят ва туҳфаҳои хотиравӣ супурда шуд.

Барои болидахотирии диловарони Ватан барномаи рангини фарҳангӣ пешниҳод гардид.

Субҳиддин ҚОДИРОВ, “ҶТ”