Ба ифтихори Рӯзи Парчами давлатии Ҷумҳурии Тоҷикистон дар маркази маъмурии вилояти Суғд - шаҳри Хуҷанд чорабинии бошукӯҳи идона баргузор гардид.

Дар роҳпаймоии идона, ки аз назди Маҷмааи таърихӣ-фарҳангии “Истиқлол” то назди Театри мазҳака-мусиқавии ба номи Камоли Хуҷандӣ сурат гирифт, беш аз 20 ҳазор нафар иштирок намуданд.

Ҷавонон, варзишгарон, сокинони касбу кори гуногун дар даст парчами давлатӣ, шиору навиштаҷоти тараннумкунандаи ватандӯстӣ, бо сарфарозӣ ва ифтихор аз Ватани ободу озод дар роҳпаймоӣ иштирок намуданд. Парчами давлатӣ, ки рамзи давлатдорӣ, соҳибихтиёрӣ мебошад, парафшонии он дар ниҳоди хурду бузург муҳаббат ба ватан, садоқат ба халқ ва сарсамини аҷдодиро дучанд менамояд.

Дар макони баргузории чорабинии асосӣ - Театри мазҳака-мусиқавии ба номи Камоли Хуҷанд раиси вилояти Суғд Раҷаб Аҳмадзода зимни суханронӣ сокинони вилоятро бо Рӯзи Парчами давлатии Ҷумҳурии Тоҷикистон таҳният намуда, аз таърихи парчамдории миллати куҳанбунёди тоҷик, нақши парчам дар давлату давлатдорӣ ва муқаддас доштани парчами давлатӣ ибрози назар кард.

Гуфта шуд, ки парчамдорӣ ҷузъи муҳими фарҳанги давлатдории халқи тоҷик ба ҳисоб рафта, Парчами давлатӣ баёнгари мавҷудияти миллат ва давлат, соҳиби тамаддун ва таърихи бостонӣ будани миллати мост. Махсусан, дар даврони нави таърихӣ Парчами давлатии мо ба рамзи ҳастии миллат, садоқат ба арзишҳои муқаддаси Ватану ватандорӣ, ҳимояи марзу буми он ва ҳифзи манфиатҳои давлату миллат мубаддал гардидааст.

Имрӯз сокинони кишвари азизамон аз он ифтихор доранд, ки Пешвои миллат муҳтарам Эмомалӣ Раҳмон Тоҷикистони маҳбуби моро дар арсаи байналмилалӣ таҳти парафшонии Парчами давлатӣ ҳамчун кишвари соҳибибтикор, сулҳдӯст ва пешбари ташаббусҳои ҷаҳонӣ муаррифӣ менамоянд.

Дар идома барномаи фарҳангӣ пешниҳоди иштирокдорони чорабинӣ гардонида шуд.

Субҳиддин ҚОДИРОВ, “ҶТ”