Дар доираи ҳафтаи саломатӣ бахшида ба Рӯзи ҷаҳонии тандурустӣ дар Маркази саратоншиносии вилояти Суғд ташхису муоина ва машварати ройгони тиббӣ ба роҳ монда шуд.

Ба иттилои масъулин, аз субҳи барвақт сокинони шаҳру ноҳияҳои вилояти Суғд ба мутахассисони Маркази саратоншиносӣ муроҷиат намуда, барои барқарор намудани саломатӣ, пешгирии беморӣ ва ба роҳ мондани тарзи ҳаёти солим ба онҳо машварат дода шуд.

Қобили зикр аст, ки бинои нави Маркази саратоншиносии вилояти Суғд соли 2025 бо дастгирии Президенти мамлакат муҳтарам Эмомалӣ Раҳмон сохта ба истифода дода шуд.

Дар Маркази саратоншиносӣ ҳуҷраҳои табобатӣ, амалиётхона бо маҷмӯи дастгоҳҳои муосири ҷарроҳӣ, таҳлилгоҳи клиникавӣ, биохимиявӣ, морфологӣ, имунаферментӣ, ҳуҷраи тадқиқоти ултрасадо ва ташхиси эндокопӣ мавҷуд буда, мутахассисони варзида, бахусус табибони саратоншинос фаъолият доранд.

Дар доираи сиёсати пешгирифтаи Ҳукумати мамлакат Вазорати тандурустӣ ва ҳифзи иҷтимоии аҳолӣ бахшида ба Рӯзи ҷаҳонии тандурустӣ ҳафтаи саломатӣ эълон намуд ва дар ҳамаи муассисаҳои соҳаи тандурустии вилояти Суғд сокинон аз хизматрасонии тиббии ройгон баҳраманд мешаванд.

Субҳиддин ҚОДИРОВ, “ҶТ”