Дар пойтахт дар доираи ҷашни 35 - солагии Истиқлоли давлатии Ҷумҳурии Тоҷикистон ба ҳолати 1 июли соли 2026-ум 6559 адад чорабинӣ, аз ҷумла бунёди 57 муассисаи таҳсилоти умумӣ ва томактабӣ бо муҷаҳҳазгардонии 513 таҷҳизоти замонавӣ, 27 муассисаи тандурустӣ, 98 коргоҳу корхонаи саноатӣ, 65 километр роҳ, 51 бинои маъмурӣ, 356 иншооти баландошёна бо 243 маркази хизматрасонӣ, 10 иншооти варзишӣ, 6 меҳмонхона, рангубори 983 бино, таъмиру азнавсозии 303 нуқтаи партовпартоӣ ва як қатор корҳои дигар бо таъсиси 11 ҳазор ҷойҳои нави корӣ амалӣ карда шудааст, ки дар натиҷа иҷрои нақша ба 1,5 маротиба баробар гардид.

Дар ин бора Бахтиёр Шарифӣ, муовини якуми раиси шаҳри Душанбе 17 июл зимни нишасти матбуотӣ иттилоъ дод.

Ба иттилои номбурда, бо мақсади боз ҳам ободу зебо гардонидани кӯчаю хиёбонҳои пойтахт давоми 6 моҳи соли ҷорӣ ба миқдори беш аз 610 ҳазор бех дарахту буттаҳо, 12,5 миллион дона гулҳои мавсимию бисёрсола шинонида шуда, дар масоҳати 124 ҳазор метри мураббаъ майдони майсазору чаманзор ташкил карда шуд.

Дар идома вобаста ба дастовардҳои хонандагони пойтахт дар нимсолаи аввали соли ҷорӣ гуфта шуд, ки дар ин давра хонандагони муассисаҳои таълимии пойтахт дар умум 2668 медал, аз ҷумла аз ҳисоби олимпиадаҳои фаннӣ дар байни минтақаҳои ҷумҳурӣ 1164 медал ва аз ҳисоби олимпиадаҳои байналмилалӣ 1504 медалро ба даст овардаанд, ки аз ин ҳисоб шаҳри Душанбе дар байни дигар минтақаҳои ҷумҳурӣ дар мақоми аввал қарор дорад.

Ҳамзамон таъкид гардид, ки дар 10 муассисаи давлатии “Мактабҳои махсуси варзишии захираҳои олимпӣ” 243 нафар мураббиёни дорои дараҷа ва унвонҳои фахрию варзишии баландихтисос ба 6402 нафар варзишгарон дар 381 гурӯҳ машқу тамринҳоро ба роҳ монданд. Дастпарварони мактабҳои махсуси варзишии захираҳои олимпӣ ва варзишгарони шаҳри Душанбе дар як қатор мусобиқаҳои бонуфузи шаҳрию ҷумҳуриявӣ, байналмилалӣ, чемпионатҳои Осиёву Ҷаҳон, Ҷоми ҷаҳон, Ҷоми Осиё ва бозиҳои Осиё ширкат варзида, соҳиби 4073 адад медал (тилло - 1322 адад, нуқра - 1213 адад ва биринҷӣ - 1538 адад) гардиданд.

“ҶТ”