Дар шаҳри Хуҷанд ҳамоиши гирандагони Стипендияи Президенти Ҷумҳурии Тоҷикистон таҳти унвони “Ҷавонон-пайравони Пешвои миллат” баргузор гардид.

Дар ин бора аз Раёсати кор бо ҷавонон ва варзиши вилояти Суғд хабар дода, илова намуданд, ки дар ҳамоиш Дилошӯб Розиқзода, сардори Раёсати рушди иҷтимоии ҷавонони дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Бахтиёр Исматзода, сардори Раёсати кор бо ҷавонон ва варзиши вилояти Суғд ва Муяссара Қаҳҳорӣ, муовини раиси шаҳри Хуҷанд иштирок ва суханронӣ намуданд.

Гуфта шуд, ки Пешвои миллат муҳтарам Эмомалӣ Раҳмон ҷавононро неруи созанда ва ояндаи давлату миллат меҳисобанд ва нисбат ба ҷавонон пайваста таваҷҷуҳ ва ғамхорӣ зоҳир карда мешавад. Зиёд шудани ҳаҷми маблағҳои стипендия ва шумораи гирандагони он шаҳодати гуфтаҳои боло буда, ҷавонон дар ҷавоб ба ин ғамхорӣ бо донишу маърифати баланд дар амалӣ шудани сиёсати Ҳукумати мамлкат саҳм мегузоранд.

Дар ҳамоиш ба гирандагони Стипендияи президентӣ, аз ҷумла ба 72 нафар аз шаҳри Хуҷанд, 41 нафар аз ноҳияи Ҷаббор Расулов, 45 нафар аз ноҳияи Спитамен, 16 нафар аз шаҳри Гулистон, 15 нафар аз шаҳри Бӯстон, 42 нафар аз ноҳияи Мастчоҳ ва 5 нафар аз шаҳри Истиқлол маблағҳои стипендия супорида шуд.

Дар фарҷом барномаи рангини фарҳангӣ пешниҳоди иштирокдорони чорабинӣ гардид.

Субҳиддин ҚОДИРОВ, “ҶТ”