16 апрел дар шаҳри Хуҷанд таҳти раёсати муовини Сарвазири Ҷумҳурии Тоҷикистон Усмоналӣ Усмонзода вобаста ба пешгирии истифодаи ғайримақсаднок ва ғайриқонунии неруи барқ, кам намудани талафоти барқ ва боло бурдани масъулиятшиносии кормандони соҳа ҷаласаи корӣ баргузор гардид.

Дар кори ҷаласа роҳбарияти Мақомоти иҷрояи ҳокимияти давлатии вилояти Суғд, муовини прокурори генералии Ҷумҳурии Тоҷикистон, директори Агентии назорати давлатии энергетикии назди Президенти Ҷумҳурии Тоҷикистон, масъулини вазорату идораҳои дахлдор ва соҳаи энергетикӣ иштирок намуданд.

Усмоналӣ Усмонзода, муовини Сарвазири Ҷумҳурии Тоҷикистон дар оғоз аз дастуру супоришҳои Пешвои миллат муҳтарам Эмомалӣ Раҳмон дар самти беҳтар намудани таъминоти барқ ва расидан ба истиқлолияти энергетикӣ ёдовар шуд.

Таваҷҷуҳи масъулин ва иштирокчиёни ҷаласа ба масъалаҳои ҳалталаб, аз ҷумла, коҳиш додани талафоти неруи барқ, пешгирии истифодаи қайриқонунӣ ва ғайримақсадноки неруи барқ, саривақт пардохт шудани ҳаққи истифодаи неруи барқ ва дигар масъалаҳои муҳим ҷалб карда шуд.

Баъди таҳлилу баррасии ҳаматарафаи масъалаҳои мавриди таваҷҷуҳ дар хотима бо боварӣ гуфта шуд, ки дар самти истифодаи мақсадноку оқилонаи неруи барқ, пешгирии талафот ва роҳ надодан бо қонуншиканӣ, баланд бардоштани маърифати истифодабарандагони неруи барқ дар оянда корбарӣ ҷоннок карда шуда, барои расидан ба истиқлолияти энергетикӣ замина гузошта мешавад.

Субҳиддин ҚОДИРОВ, “ҶТ”