Дар маркази ноҳияи Деваштич – шаҳраки Ғончӣ бахшида ба 35-солагии Истиқлоли давлатии Ҷумҳурии Тоҷикистон дар доираи Соли вусъат додани корҳои ободонию созандагӣ ва тақвияту таҳкими худшиносию худогоҳии миллӣ бинои маркази ҷавонони ноҳия сохта хоҳад шуд.

Тибқи иттилои АМИТ “Ховар” бино аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва соҳибкорону ташаббускорони ватанӣ бунёд гардида, он тибқи лоиҳа аз 3 ошёна, ҳуҷраҳои корӣ, маҷлисгоҳ, толори варзишӣ ва дигар шароити зарурӣ барои ҷавонон иборат мебошад.

Гуфта мешавад, лоиҳаи иншоот мутобиқ ба талаботи замон таҳия гардида, бино бо истифода аз масолеҳи сохтмонии ватанӣ бо сифати баланд ва дар муҳлати муайянгардида бунёд меёбад. Бо мавриди истифода қарор гирифтани марказ барои ҷавонони ноҳия дар самти забономӯзӣ, аз худ кардани нозукиҳои технологияи муосир, ҳунарҳои гуногун ва ташкили маҳфилу чорабиниҳо имконияти васеъ фароҳам оварда мешавад.

“ҶТ”