Дар шаш моҳи соли равон дар ҷумҳурӣ 13 ҳазору 89 ҷиноят ба қайд гирифта шудааст, ки нисбати соли гузашта 1 ҳазору 285 ҷиноят бештар аст. Аз ин шумора 72 фоизи ҷиноятҳо кушода шудааст.

Дар ин бора Рамазон Раҳимзода, вазири корҳои дохилии кишвар имрӯз - 7 август зимни нишасти хабарии ин ниҳод иттилоъ дод.

Гуфта шуд, ки дар ин давра одамкушӣ ва суйиқасд ба ҷони одамон 28, роҳзанӣ 20, ғоратгарӣ 57, таҷовуз ба номус 24, қасдан расонидани зарари вазнин ба саломатӣ 64, авбошӣ 762, қаллобӣ 2356, дуздӣ 2182, тамаъҷуӣ 33 ва муомилоти ғайриқонунии воситаҳои нашъадор 486 ҳолат ба ҳисоб гирифта шудааст.

Ҳамчунин, зикр гардид, ки ҷинояти одамкушӣ ва суйиқасд ба ҷони одамон дар ин давра коҳиш ёфтааст. Ин ҷиноят соли гузашта 41 ҳолатро ташкил медод.

Аммо ҳолати таҷовуз ба номус нисбат ба ҳамин давраи соли гузашта бештар ба қайд гирифта шудааст. Ин ҷиноят соли қабл 17 ҳолат қайд гардида буд.

Ҷинояткорӣ миёни ҷавонон 1574 ҳолатро ташкил медиҳад, ки нисбати соли гузашта 30 ҳолат кам аст.

Сайёраи ҚИЁМИДДИН, “ҶТ”