Дастаи мунтахаби наврасони то 17-солаи Тоҷикистон дар қисми ниҳоии Ҷоми Осиё-2025, ки аз 3 то 20 апрел дар Арабистони Саудӣ баргузор мешавад, рақибони худро пайдо намуданд.

Рақибони наврасони кишвар пас аз қуръакашии Ҷоми Осиё-2025, ки имрӯз 23-уми январ дар қароргоҳи Конфедератсияи футболи Осиё дар Куала-Лумпур баргузор шуд, муайян гардиданд. Ҳамакнун мунтахаби наврасони Тоҷикистон (U-17) дар гурӯҳи “D” қарор гирифт. Рақибони дастаи мо мунтахабҳои Эрон, Уммон ва Кореяи Шимолӣ хоҳанд буд.

Бояд гуфт, ки дар мусобиқаи мазкур ҳамагӣ шонздаҳ даста ба чаҳор гурӯҳ – “А”, “В”, “С” ва “D” тақсим шуданд, ки ҳар кадом аз чаҳор дастаӣ иборатанд. Баъди анҷоми марҳилаи гурӯҳӣ аз ҳар гурӯҳ ду тими беҳтарин ба даври чаҳорякниҳоии Ҷоми Осиё-2025 роҳ меёбанд. Ҳамаи иштирокчиёни даври чорякниҳоӣ соҳиби роҳхати Чемпионати ҷаҳон-2025 миёни наврасон мешаванд, ки аз 5 то 27 ноябр дар Қатар баргузор мешавад.