Имрӯз, 7 май дар “IT-PARK DUSHANBE” бо ташаббуси Хадамоти алоқаи назди Ҳукумати Ҷумҳурии Тоҷикистон ба муносибати Рӯзи телевизион, радио ва кормандони соҳаи алоқа чорабинии ҷашнӣ доир шуд.

Дар ин бора аз Хадамоти алоқаи назди Ҳукумати Ҷумҳурии Тоҷикистон хабар доданд.

Тибқи иттилоъ, дар чорабинии мазкур меҳмонон аз вазорату идораҳо, масъулини соҳаи алоқа ва намояндагони ВАО иштирок карданд.

Дар ибтидои чорабинӣ Исфандиёри Саъдулло, сардори Хадамоти алоқаи назди Ҳукумати Ҷумҳурии Тоҷикистон, Абдураҳмон Абдураҳмонзода, муовини раиси шаҳри Душанбе ва Хуршед Мирзо, директори Агентии инноватсия ва технологияҳои рақамии назди Президенти Ҷумҳурии Тоҷикистон баромад намуда, иди касбии кормандони телевизион, радио ва соҳаи алоқаро ба ҳозирин ва масъулин муборакбод гуфтанд.

Зимни баромадҳо аз дастовардҳои соҳа ёдоварӣ шуда, ҳамзамон таъкид гардид, ки дар асри 21 татбиқ ва баҳрабардории васеъ аз технологияҳои иттилоотиву иртиботӣ авлавияти хос ва аҳамияти стратегӣ пайдо кардааст.

Аз ҷумла, Исфандиёри Саъдулло, сардори Хадамоти алоқаи назди Ҳукумати Ҷумҳурии Тоҷикистон зимни баромади хеш иброз дошт, ки имрӯз нақши алоқа бо маҷмуи самтҳои хеш ба муҳимтарин ҷузъи ҳаёти башарӣ табдил ёфта, дунёи муосирро бе воситаҳои алоқа ва иттилоот тасаввур кардан ғайриимкон аст.

- Ин василаҳои иртибототи оммавӣ на фақат фосилаҳоро наздик месозад, балки дилҳоро муттаҳид карда, ҳамбастагиро ба вуҷуд меорад. Бо таҳаввулоти рӯзафзуни илму техника ва навовариҳои муосир соҳаи алоқа низ пайваста дар ҳоли дигаргуниҳои зерсохторӣ қарор дорад. Бо назардошти ин, бо итминон метавон гуфт, ки дар партави дастуру ҳидоятҳои Пешвои миллат ислоҳоти соҳаи мазкур дар кишвари маҳбубамон бо маром идома дорад, - гуфт сардори Хадамоти алоқа.

Дар идома як қатор ниҳодҳои давлатӣ, ширкатҳои мобилӣ, провайдерҳои интернетӣ, ВАО, кормандон ва собиқадорони соҳаҳои алоқа бо Сипоснома ва Ифтихорномаи Хадамоти алоқаи назди Ҳукумати Ҷумҳурии Тоҷикистон ва ҷоизаи “Устоди алоқа” қадрдонӣ шуданд.

Барномаи фарҳангӣ анҷомбахши чорабинӣ гардид.

“ҶТ”