Дар Тоҷикистон барои кормандоне, ки реҷаи 5 рӯзаи ҳафтаи корӣ доранд, рӯзи ҷумъа – 28 июн истироҳатӣ эълон карда шуд.

Дар ин бора Маликшоҳ Неъматзода, раиси Федератсияи иттифоқҳои касабаи мустақили Тоҷикистон дар саҳифаи фейсбукии худ хабар дод.

Ба навиштаи Маликшоҳ Неъматзода ин тасмим дар асоси Қарори Ҳукумати Ҷумҳурии Тоҷикистон, ки аз 17 феврали соли 2024, №71 гирифта шуда, дар асоси он рӯзи 22 июн, ки ба рӯзи шанбеи ҳафта рост меояд, рӯзи корӣ эълон шудааст.

- Бо ҳамин назардошт, ба кормандоне, ки реҷаи 5 рӯзаи ҳафтаи корӣ доранд, 27 июн (панҷшанбе) - Рӯзи Ваҳдати миллӣ, 28(ҷумъа), 29(шанбе) ва 30 (якшанбе) рўзҳои истироҳатӣ ҳисобида мешаванд,- навиштааст раиси Федератсияи иттифоқҳои касабаи мустақили Тоҷикистон.

Ин ба он маъност, ки кормандони дорои реҷаи 5 рӯзаи корӣ дар ҳафтаи охири моҳи июн ба 4 рӯзи пайдарпайи истироҳат ҳуқуқ доранд.

Наҷиба МУРОДБЕКОВА, “ҶТ”