Зери ҳамин унвон бахшида ба Рӯзи Парчами миллии Ҷумҳурии Тоҷикистон дар Донишгоҳи давлатии Хоруғ ба номи Моёншо Назаршоев (ДДХ) конференсияи илмӣ – амалӣ доир гашт.

Дар чорабинӣ намояндагони мақомоти иҷроияи маҳаллии ҳокимияти давлатии ВМКБ, муовини ректор оид ба илм ва инноватсия Таҳмина Содатқадамова, декани факултети таърих ва ҳуқуқ Лола Назархудоева, мудири шуъбаи илм ва инноватсия Ҳабиба Элназарова ва дигар устодону донишҷӯён ширкату баромад намуданд.

Зимни баромади хеш Т. Содатқадамова қайд кард, ки Парчами давлатии Тоҷикистон рамзи Истиқлолияти давлатӣ, дӯстиву бародарии ҳамаи сокинони кишвар, нишони соҳибтамаддунӣ ва куҳанбунёдии миллати тоҷик мебошад.

“Ливои миллии мо нишонаи соҳибихтиёрии давлат, аломати соҳибватан будани ҳар як тоҷики Тоҷикистонӣ ва тоҷики бурунмарзӣ мебошад. Парчами давлатӣ таҷассумгари хусусиятҳои таърихӣ, нишони давлатдории гузаштаи тоҷикон инчунин ифодакунандаи мақсаду маром ва ормонҳои тамоми мардуми шарифи ҷумҳурӣ мебошад. Барои хурду бузурги мамлакат Парчами давлатӣ ҳамчун муқаддасот, тимсоли Ваҳдати миллӣ, ягонагӣ буда, мардумро ба сӯи созандагиву бунёдкорӣ ҳидоят мекунад.” – афзуд Т. Содатқадамова.

Таъкид гардид, ки Парчами давлатӣ ҳар як сокини Тоҷикистонро ба ифтихор аз давлату давлатдорӣ, истиқлолияти миллӣ, ҳифзи дастовардҳои он ва пеш аз ҳама ваҳдати миллӣ ва кӯшишу талоши пайваста ба хотири ободии сарзамини аҷдодӣ ҳидоят менамояд.
Дар идомаи конференсия профессори донишгоҳ Элбон Ҳоҷибеков, номзади илмҳои таърих Гулмоҳ Сафдарқулова, донишҷӯи курси якуми шуъбаи таърихи ДДХ Туйхон Саидзод дар мавзӯъҳои “Парчамҳои таърихии Тоҷикистон”, “Парчами соҳибистиқлоли Тоҷикистон” ва “Парчами давлатии Тоҷикистон рамзи соҳибистиқлолӣ” маърӯза намуданд.