Таҳти ҳамин унвон дар ҷамоати деҳоти Себистони ноҳияи Данғара аксияи оммавӣ баргузор гардид.

Дар ин бора аз бахши кор бо ҷавонон ва варзиши ноҳияи Данғара иттилоъ доданд.

Ба иттилои манбаъ аксияи мазкур ба хотири арҷгузорӣ ва гиромидошти Парчами давлатӣ сурат гирифта, ҳадаф аз он боло бурдани ҳисси худшиносии шаҳрвандон арзёбӣ мегардад.

Гуфта шуд, ки дар доираи аксия дар боми хонаҳои истиқоматӣ, болои дарвозаҳо ва дар дохили айвону ҳуҷраҳо Парчамро – ҳамчун рамзи соҳибихтиёриву соҳибдавлатӣ насб кардаанд.

Ҳамчунин, масъулин таъкид карданд, ки ин аксияи дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сурат гирифтааст, ки дар ҷаласаи васеъи Ҳизби Халқии Демократии Тоҷикистон дар ин маврид сухан рафта буд.

Сокинон ҳам бо хушнудӣ аз ин иқдом истиқбол намуда, Парчами давлатиро бо ифтихор дар хонаҳояшон насб карданд.

“ҶТ”