29 январ, дар маркази матбуотии ҷумҳуриявии “Ховар” нишасти хабарии Кумитаи меъморӣ ва сохтмони назди Ҳукумати Ҷумҳурии Тоҷикистон доир гардид .

Аҳмадзода Ҷамшед Ҷалол, раиси Кумитаи меъморӣ ва сохтмон, зимни нишаст бо хабарнигорон иброз дошт, ки соли 2018 инвеститсияи сармояи асосӣ аз ҳисоби ҳамаи манбаъҳои сармоядиҳӣ ба маблағи 13 миллиарду 51 миллиону 400 ҳазор сомонӣ истифода шудааст. Дар соли гузашта ба масоҳати умумии 1 миллиону 98 ҳазору 500 метри мураббаъ хонаҳои истиқоматӣ ба истифода дода шуданд. Моҳҳои январ-декабри соли 2018 фондҳои асосӣ ба маблағи 3 миллиарду 994 миллиону 800 ҳазор сомонӣ ба кор андохта шуда, иҷроиши корҳои сохтмонию васлгарӣ 10 милларду 328 миллион сомониро ташкил дод.

Дар идома таъкид гардид, ки мутобиқ ба талаботи Кодекси шаҳрсозии Ҷумҳурии Тоҷикистон дар қаламрави ҷумҳурӣ нисбати сифати корҳои сохтмонию васлкунӣ дар 65 шаҳру ноҳияҳо 2842 санҷиши сифати корҳои сохтмонию васлгарӣ гузаронида шуда, дар натиҷа 4571 адад камбудӣ ошкор ва ба маблағи 629100 сомонӣ ҷаримабандӣ шуданд.