ҶОМЕА
Шанбе 22 Июн 2024 10:13
10382
Имрӯз, 27-уми май дар кинотеатри “Ватан”-и шаҳри Душанбе маросими ҷамъбасти озмуни ҷумҳуриявии “ТАРАННУМИ ВАТАН” бо шукӯҳу шаҳомати хосса баргузор гардид.

Дар маросими ҷамъбастӣ Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Ато Мирхоҷа, муовини раиси Иттифоқи нависандагони Тоҷикистон, иштирокчиёни озмун, намояндагони рӯзномаву маҷаллаҳо ва ҷавонон иштирок намуданд.

Маросими ҷамъбасти озмуни ҷумҳуриявии “ТАРАННУМИ ВАТАН” бо садо додани Суруди миллӣ оғоз гардид.

Сипас, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо сухани ифтитоҳӣ баромад намуда, нахуст ҳамаи иштирокчиёнро ба муносибати Рӯзи ҷавонони Тоҷикистон ва Рӯзи ҷаҳонии футбол самимона табрик намуданд.

- Мо хушбахту сарфарозем, ки ҷавонони сарбаланди тоҷик имрӯзҳо дар ҳамаи соҳаву бахшҳои ҳаёти давлат ва ҷомеа фаъолона иштирок карда, дар пешбурди ҳаёти мамлакат саҳми арзандаи худро мегузоранд. Боиси ифтихору сарфарозист, ки сол аз сол ҳисси ватандӯстии ҷавонони мо боло рафта, дар гиромидошти арзишҳо ва муқаддасоти миллӣ саҳми намоён мегузоранд. Ҳамин аст, ки Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон дар паёми табрикиашон ба муносибати Рӯзи ҷавонони Тоҷикистон ҷавононро умеду ояндаи давлат ва халқи Тоҷикистон хонданд, - иброз дошт, Зулфиқор Гулаҳмадзода.

Раиси Кумита дар идома гуфт: “Давоми як моҳи гузашта барои боз ҳам боло бурдани ҳисси худшиносии ҷавонон, тарғиб ва тарбияи эҳсоси ватандӯстӣ дар замири ҳар як фарди кишвар, ифтихор аз истиқлоли давлатӣ ва кашфи истеъдодҳои ҷавон Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Муассисаи давлатии рӯзномаи “Ҷавонони Тоҷикистон” озмуни ҷумҳуриявии “Тараннуми Ватан”-ро эълон карда буд. Дар ин муддат мо шоҳиди он гаштем, ки ҷавонон ва дар симои онҳо тамоми қишрҳои ҷомеа дар масъалаи ватан ва ватандорӣ бетарафиро ихтиёр накарда, мекӯшиданд, саҳми худро барои боло бурдани эҳсоси ватандӯстии насли наврасу ҷавон гузоранд. Дар ин муддат 124 маводи ба озмун пешниҳодшуда тариқи шабакаҳои иҷтимоӣ, махсусан саҳифаи фейсбукии рӯзномаи “Ҷавонони Тоҷикистон” нашр шуда, дар фазои иҷтимоӣ ҳаводорони зиёдеро ба худ ҷалб созанд. Озмуни ҷумҳуриявии “Тараннуми Ватан” боиси он гардид, ки зиёда аз 1 миллион шаҳрванди кишвар, сар карда аз хонандагони мактаб то бузургсолон дар масъалаи ватандӯстӣ ва ватандорӣ андеша намоянду бетарафиро ихтиёр накунанд. 1 миллион шаҳрванди кишвар перомуни ватанаш шунид. 1 миллион нафар ҳаддалимкон лаҳзае ба ин андешид, ки ӯ соҳибватан аст”.

Дар идома раиси Кумита ба ҳайати эҷодии рӯзномаи “Ҷавонони Тоҷикистон” барои дар сатҳи баланди ташкилӣ баргузор кардани озмун ва ба Мақомоти иҷроияи ҳокимияти давлатии ноҳияи Рӯшони Вилояти Мухтори Кӯҳистони Бадахшон барои сарпарастӣ кардани як қисмати озмун сипосгузорӣ намуд.

Ато Мирхоҷа, муовини раиси Иттифоқи нависандагони Тоҷикистон зимни суханронии хеш барои ташкил намудани чунин озмуни ватандӯстона изҳори сипос намуда, дар охир як шеъри тозаэҷоди худро, ки ба озмуни ҷумҳуриявии “ТАРАННУМИ ВАТАН” бахшидаанд, қироат намуд:

- Ин Ватанро касе тараннум кард,
Ки худашро дар ишқи он гум кард.
Руҳи озоди миллати худро
Бо сухан, бо қалам таҷассум кард.
Об гардид, гашт уқёнус,
Баҳри дур сохтан талотум кард.
Ҳусн афзуд Тоҷикистонро,
Хештанро азизи мардум кард.

Баъди суханронии ифтитоҳӣ ғолибони озмуни ҷумҳуриявии “ТАРАННУМИ ВАТАН” муаррифӣ ва қадрдонӣ гардиданд.
Ҳамин тавр, сазовори ҷойи аввали озмуни мазкур Шоира Мадалиева гардида, бо диплом ва ноутбук сарфароз гардонида шуд.
Бахтиёр Раҳмониён ва Зайнаб Ҳусейнова бо соҳиб шудан ба ҷойи дуюм бо диплому планшет, Ғунчагул Нурализода, Рустам Азимов ва Гулҷон Наҷмиддинова бо сазовор гардидан ба ҷойи сеюм бо диплому телефони мобилӣ қадрдонӣ шуданд.

Ғолибони чор ҷойи ифтихории озмун – Бег Раҳмонӣ, Омина Рустамова, Боқӣ Шарифов ва Манучеҳр Мирсаидов бо ифтихорнома ва мукофотпулӣ дар ҳаҷми 1000 – сомонӣ сарфароз гардиданд.

Инчунин, ба иштирокчиёни фаъоли озмун Сипоснома ва соатҳои ҳушманд супорида шуд, ки инҳоянд: - Парисо Давлатзода, Мирзошариф Абдусаломов, Абдурофеъ Гадоев, Эҳсони Ризо, Шукрона Хуҷамқулова, Саид Ҳалими Шоҳонӣ, Туҳфа Муқимзода, Моҳира Одиназода, Дилшод Алсамадов, Шукрона Ҳасанзода, Умеда Мастибекова ва Зайнуриддин Заҳайризода.

Баҳри болидаруҳии иштирокчиён аз ҷониби ҳунармандон якчанд суруди ватандӯстона пешниҳод гардида, маросими ҷамъбасти озмуни ҷумҳуриявии “ТАРАННУМИ ВАТАН” бо гирифтани акси хотиравӣ бо ғолибони озмун ба охир расид.

Ёдовар мешавем, ки озмуни мазкур бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Муассисаи давлатии рӯзномаи “Ҷавонони Тоҷикистон” ба муносибати Рӯзи ҷавонони Тоҷикистон ва дар доираи Моҳвораи ҷавонон аз 15-уми апрел то 15-уми майи соли ҷорӣ гузаронида шуда, дар он ҳудуди 124 нафар иштирок намуданд.


Эзоҳи худро нависед



Рамзҳо дар расм