Имрӯз - 17 феврал дар меҳмонхонаи “Ҳайат Реҷенсӣ”-и шаҳри Душанбе маросими ҷоизасупории соҳаи тарбияи ҷисмонӣ ва варзиш дар соли 2024 баргузор гардид.

Дар маросими ҷоизасупори беш аз 200 нафар мураббиёну варзишгарони комёбу муваффақ ва беҳтаринҳои соҳаи варзиши мамлакат ҳавасманд гардонида шуданд.

Пеш аз оғози маросими расмии ҷоизасупорӣ филми кӯтоҳметражи мустанад оид ба дастоварду комгории соҳаи варзиши кишвар дар соли 2024 дар ҳаҷми 10 дақиқа манзури ҳозирин гардонида шуд.

Дар маросими мазкур муовини Сарвазири Ҷумҳурии Тоҷикистон - Дилрабо Мансурӣ, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон - Зулфиқор Гулаҳмадзода ва роҳбарону намояндагони вазорату идораҳо, варзишгарон, роҳбарону мураббиёни сохторҳои варзишии мамлакат, собиқадорону фаъолони соҳаи варзиш ва ғолибону ҷоизадорони мусобиқаҳои сатҳи байналмилалии варзишӣ дар соли 2024 иштирок намуданд.

Пас аз суханронии муовини Сарвазир 46 нафар ғолибону ҷоизадорони мусобиқаҳои сатҳи байналмилалии варзишӣ ва мураббиёни онҳо бо мукофотпулиҳои Ҷоизаи Президенти Ҷумҳурии Тоҷикистон ҳавасманд гардонида шуданд.

Ҳамзамон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон озмунҳои “Варзишгари беҳтарини сол”, “Мураббии беҳтарини сол”, “Мактаби варзишии беҳтарини сол”, “Беҳтарин федератсияи варзишии сол”, “Беҳтарин иншооти варзишии сол”, “Беҳтарин шаҳри варзишии сол”, “Беҳтарин васоити ахбори омма дар соҳаи тарбияи ҷисмонӣ ва варзиш”, “Беҳтарин сохтори маҳаллӣ дар соҳаи тарбияи ҷисмонӣ ва варзиш”, “Шореҳи беҳтарини соҳаи варзиш” ва “Варзишгарнавраси умедбахш” дар соли 2024-ро эълон намуд, ки беҳтаринҳо муайян карда шуда, дар маросими ҷоизасупории имрӯза қадрдонӣ шуданд.

Дар охири ҳамоиш гурӯҳи ҳаваскорони Оркестри симфонии Дастгоҳи иҷроияи Президенти Ҷумҳурии Тоҷикистон бо оҳангҳои ҷазобӣ ватандӯстиву ҷавонӣ фазои чорабиниро гарму мунаввар гардониданд.

Қайд кардан зарур аст, ки Ҷоизаи Президенти Тоҷикистон соли 2015 таъсис ёфта, бори нуҳум аст, ки ба ғолибону ҷоизадорони мусобиқаҳои байналмилалӣ ва мураббиёни онҳо супурда мешавад.

Бояд гуфт, ки ҷоизаи мазкур то ин давра ба 370 нафар ғолибону ҷоизадорони мусобиқаҳои сатҳи байналмилалӣ аз Фонди захиравии Президенти Тоҷикистон 8 миллиону 250 ҳазор сомонӣ мукофотпулӣ ҷудо гардида, дар вазъияти тантанавӣ тақдим карда шудааст.

Яҳё МАҲМАДНАБИЕВ, “ҶТ”