Шуруъ аз имрӯз, 22 ноябр то 26 ноябр дар шаҳри Сиктивкари Ҷумҳурии Комии Федератсияи Русия Бозиҳои 18-уми Делфии ҷавонони кишварҳои аъзои Иттиҳоди Давлатҳои Мустақил ва Бозиҳои 3-юми арктикии Делфи баргузор мегарданд.

Дар ин хусус аз Вазорати фарҳанги Ҷумҳурии Тоҷикистон хабар доданд.

Бино ба маълумот, Ҷумҳурии Тоҷикистонро дар ин чорабиниҳо ғолибони Озмуни ҷумҳуриявии “Тоҷикистон-Ватани азизи ман” - донишҷӯёни муассисаҳои таълимии соҳаи фарҳангу санъат (Консерваторияи миллии Тоҷикистон, Коллеҷи санъати ба номи А. Бобоқулов, Коллеҷи санъати шаҳри Хуҷанд ба номи Содирхон Ҳофиз ва Коллеҷи ҷумҳуриявии рассомӣ) муаррифӣ менамоянд. Намояндагони Тоҷикистон дар равияҳои академӣ, эстрада, созҳои миллӣ, овозхонӣ ва рассомӣ иштирок мекунанд.

Ҳамчунин, дар назар дошта шудааст, ки дар доираи Бозиҳои 18-уми Делфии ҷавонони кишварҳои аъзои Иттиҳоди Давлатҳои Мустақил дар мавзуи “Ҳамкории фарҳангии давлатҳои аъзои Созмони ҳамкории Шанхай” Форуми байналмилалӣ низ доир шавад.

Бояд изҳор дошт, ки аз 15 то 17 октябри соли 2022 Тоҷикистон маротибаи аввал мизбони Бозиҳои 16-уми Делфии ҷавонони кишварҳои аъзои Иттиҳоди Давлатҳои Мустақил гардида буд. Дар он зиёда аз 400 нафар истеъдодҳои ҷавони аз 10 то 25-сола аз тамоми кишварҳои Иттиҳоди Давлатҳои Мустақил иштирок намуда буданд.

Ҷасури ҚИЁМИДДИН, “ҶТ”