Имрӯз-11 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маркази ноҳияи Сангвор бо бардоштани парда аз рӯйи лавҳаи рамзӣ Нишони давлатӣ ва муҷассамаи Шоҳ Исмоили Сомониро мавриди истифода қарор доданд.

Дар ин хусус Хадамоти матбуотии Президент иттилоъ медиҳад.

Бино ба иттилои манбаъ Сарвари давлат муҳтарам Эмомалӣ Раҳмон нахуст бо нишони арҷгузорӣ ба муқаддасоти миллӣ дар пояи Нишони давлатӣ гулчанбар гузоштанд.

Гуфта мешавад, ки нишони давлатӣ дар маркази ноҳия бо санъати баланди меъморӣ ва истифодаи сангҳои ороишӣ дар муддати қариб як сол бунёд шуда, баландии пояи он 25 метрро ташкил медиҳад.

Ҳамчунин, Пешвои миллат муҳтарам Эмомалӣ Раҳмон дар ҳамин мавзеъ парда аз рӯи муҷассамаи бунёдгузори давлати бузурги Сомониён - Шоҳ Исмоили Сомонӣ бардоштанд.

Иттилоъ дода шуд, ки муҷассама аз ҷониби ҳайкалтарош Алиҷон Бобошарифов бо санъати баланд сохта шуда, баландии муҷассамаи Шоҳ Исмоили Сомонӣ дар ноҳияи Сангвор 5,3 метр буда, дар умум бо таҳкурсӣ ба 9 метр мерасад.

Ҳамзамон дар ду паҳлӯи муҷассама тандиси ду шер ҳамчун рамзи ҷасорату тавонмандии миллати тоҷик гузошта шудааст.

Бояд гуфт, ки масоҳати умумии гулгашти Нишони давлатӣ ва муҷассамаи Шоҳ Исмоили Сомонӣ 47 садяк заминро дар бар гирифта, корҳои сохтмонӣ аз тарафи бинокорони Ташкилоти ҷамъиятии “Офиятбахш”, бо сифати баланд ба анҷом расонида шудааст.