Хадамоти гумруки назди Ҳукумати Ҷумҳурии Тоҷикистон нақшаи пардохтҳои гумрукиро дар соли 2024 барзиёд иҷро намудааст.

Дар ин бора 12 феврал Хуршед Каримзода, сардори Хадамоти гумруки кишвар зимни нишасти хабарӣ иттилоъ дод.

Номбурда гуфт, ки новобаста аз идома ёфтани буҳрони молиявӣ - иқтисодӣ дар робита ба ногувор шудани вазъи сиёсии минтақа ва ҷаҳон, ки боиси ба миён омадани душвориҳои зиёд ҳангоми интиқоли борҳо миёни шарикони тиҷоратии хориҷии ҷумҳурӣ гардид, Хадамоти гумрук тавонист иҷрои нақшаи пардохтҳои гумрукиро барзиёд таъмин намояд.

Сабаби асосии барзиёди иҷроиш рақамикунонии соҳа ва дар ин раванд такмил додани низоми маъмурикунонии гумрукӣ арзёбӣ шуд.

Аз ҷумла, зикр гардид, ки қабулу татбиқи амалии Барномаи миёнамуҳлати рушди мақомоти гумруки Ҷумҳурии Тоҷикистон барои солҳои 2020 - 2024 ва Нақшаи чорабиниҳои оид ба амалисозии он дар ин самт нақши муассир дорад.

Фарзонаи УМАРАЛӢ, “ҶТ”