Дар нимсолаи аввали соли 2024 дар Ҷумҳурии Тоҷикистон мусодираи маводи нашъаовар зиёд гардида, зиёда аз 3 тонна ин навъи маҳсулот аз муомилоти ғайриқонунӣ бароварда шудааст.

Дар ин бора имрӯз Самад Зафар, директори Агентии назорати маводи нашъаовари назди Президенти Ҷумҳурии Тоҷикистон зимни нишасти хабарии ниҳодаш иттилоъ дод.

Номбурда гуфт, дар ин давра дар Ҷумҳурии Тоҷикистон 3 тоннаву 96 гр маводи нашъаовар мусодира гардидааст, ки нисбат ба ҳамин давраи соли гузашта 619 кг зиёд мебошад.

- Аз ҳамин ҳисоб ба Агентӣ 217 кг 820 гр, Вазорати корҳои дохилӣ 2 тоннаву 89 кг, Кумитаи давлатии амнияти миллӣ 789 кг ва Агентии назорати давлати молиявӣ ва мубориза бо коррупсия 508 гр рост меояд,-зикр кард директори Агентӣ.

Ҳамзамон, зикр гардид, ки дар Тоҷикистон лабораторияҳои истеҳсоли маводи мухаддир мавҷуд набуда, ин маводҳо аз дигар кишварҳо, алалхусус аз Афғонистон бо роҳи қочоқ ворид карда мешаванд.

Дар ин давра аз ҷониби мақомоти ҳифзи ҳуқуқ ва сохторҳои қудратии кишвар 11 ҳазору 860 ҷиноятҳои умумӣ ба қайд гирифта шудааст, ки нисбат ба ҳамин давраи соли гузашта 248 ҷиноят зиёд мебошад.

Аз ин шумора 419 ҷиноят вобата ба маводи нашъаовар буда, дар қиёс бо ҳамин давраи соли гузашта 7,2 фоиз ё 28 ҷиноят зиёд аст.

Инчунин дар ин давра вобаста ба ҷиноятҳои маводи нашъаовар дар кишвар 515 нафар дастгир гардидаанд, ки нисбати ҳамин давраи соли гузашта 87 нафар зиёд мебошад.