Дар доираи Форуми ҷавонони кишварҳои Осиёи Марказӣ ва Шурои ҳамкории кишварҳои Халиҷ дар шаҳри Душанбе мулоқоти Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо намояндаи Созмони ҷаҳонии ҷавонони мусалмони Ассамблеяи ҷаҳонии ҷавонони мусалмон ҷаноби Қосим ал Ғурайбӣ баргузор гардид.

Дар ҷараёни мулоқот ҷонибҳо масъалаҳои тақвияти ҳамкории бисёрсамта дар соҳаи маърифат, тарбия ва рушди шахсияти ҷавононро баррасӣ намуданд.

Раиси Кумита зикр кард, ки сиёсати давлатии ҷавонон дар Тоҷикистон ба тарбияи инсони масъулиятшинос, ватандӯст ва маърифатпарвар асос ёфта, дар ин замина Ассамблеяи ҷаҳонии ҷавонони мусалмон метавонад шарики стратегӣ бошад.
Ҷониби Тоҷикистон пешниҳод намуд, ки бо дастгирии Ассамблеяи ҷаҳонии ҷавонони мусалмон дар яке аз минтақаҳои ҷумҳурӣ маркази таълимӣ-маърифатии ҷавонон таъсис дода шавад, ки дар он курсҳо, семинарҳо, лагерҳои таълимӣ ва чорабиниҳои фарҳангӣ баргузор хоҳанд гардид.

Ҷаноби Қосим ал Ғурайбӣ, намояндаи Ассамблеяи ҷаҳонии ҷавонони мусалмон ташаккури худро ба Ҳукумати Ҷумҳурии Тоҷикистон барои ташкили Форуми сатҳи баланд изҳор намуда, омодагии ташкилотро ҷиҳати густариши ҳамкориҳои доимӣ бо Тоҷикистон таъкид кард.

Ҷонибҳо ба мувофиқа расиданд, ки нақшаи муштараки ҳамкориро барои солҳои 2025–2027 таҳия намуда, бо марҳилаҳои мушаххас ва иқдомҳои амалӣ татбиқ менамоянд.

“ҶТ”