Имрӯз дар шаҳри Душанбе Гулаҳмадзода Зулфиқор Аҳмад, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноиби аввали Кумитаи миллии олимпии Тоҷикистон тариқи маҷозӣ бо Шайх Суҳайл ибни Буттӣ Оли Мактум, муовини вазири варзиши Аморати Муттаҳидаи Араб, котиби генералии Иттиҳодияи варзиш барои муассисаҳои мактабӣ ва донишгоҳии Аморати Муттаҳидаи Араб мулоқот намуданд.

Тибқи иттилои маркази таҳлил ва иттилооти Кумитаи кор бо ҷавонон ва варзиш, зимни суҳбат ҷонибҳо доир ба рушди тарбияи ҷисмонӣ ва варзиш, ҳамкориҳои мутақобилан судманди ду кишвар дар соҳаи варзиш табодули афкор намуда, доир ба як зумра масъалаҳо, аз қабили гузаронидани мусобиқаҳои дӯстона дар намудҳои мухталифи варзиш, мубодилаи таҷриба дар рушди инфрасохтори соҳаи тарбияи ҷисмонӣ ва варзиш, ташкили барномаҳои омӯзишӣ ва табодули мутахассисон миёни муассисаҳои варзишии ду кишвар ва тақвият бахшидани ҳамкориҳо барои иштироки фаъоли ҷавонону варзишгарони ҳарду кишвар дар чорабиниҳои байналмилалие, ки дар қаламрави Ҷумҳурии Тоҷикистон ва Аморати Муттаҳидаи Араб доир мегардад, муколама намуданд.

“ҶТ”