Парчам рамзи давлат-дорӣ ва истиқлолияти воқеӣ буда, мояи ифтихори ҳар ватандор маҳсуб меёбад. Ин аст, ки ҳар сол дар кишвар 24 ноябр ҳамчун Рӯзи парчами давлатӣ таҷлил мегардад. Ба муносибати ин рӯзи таърихӣ мо низ тасмим гирифтем назари чанде аз ҷавононро вобаста ба эҳтиром ба Парчами миллӣ, арҷ гузоштан ба ин муқаддасот ва эҳсоси ифтихору сарбаландӣ аз дош-тани он, ҷамъ овардаву пешниҳоди хонандагон намоем.

Эмомалӣ НУРАЛӢ, ҷудокор:

- Парчам яке аз нишонаҳои ватандорист, ки ҳар як варзишгар метавонад зери ин парчам баромаду давлати худро дар хориҷи кишвар муаррифӣ кунад. Ман чун варзишгари ҷавони даврони Истиқлол нахуст аз тоҷик буданам ифтихор мекунам, баъдан фахр дорам, ки бо ин парчам Тоҷикистонро намояндагӣ мекунам. Парафшон гаштанашро барои худ масъулият медонам ва замоне дар қатори парчамҳои дигар кишварҳо боло шуданашро мебинам, ҳисси ифтихору ғурур маро фаро мегирад. Ман парчами ватанамонро дӯст медорам.

Одил НОЗИР, рӯзноманигор:

- Парчами миллӣ рамзи давлатдорӣ ва иттиҳоди халқ аст. Мо-тоҷикон ифтихор мекунем, ки дар таърих яке аз нахустин парчамҳоро аҷдодони мо парафшон карда буданд ва он Диравши Кова буд. Аввалин дирафши аҷдодии миллии тоҷикон “Диравши Ковиён (Ахтари Ковиён) - диравши бузурги шоҳони асотирии Каёнӣ, таърихи Ҳахоманишинӣ, Ашконӣ ва Сосонӣ буд, ки мувофиқи ривоёти ақвоми эронӣ аз замони Фаридун боз вуҷуд доштааст. Агарчӣ ибтидои зуҳури он ба иборати имрӯзӣ “асотирӣ”- ст, вале мавҷудияташ дар имтидоди давраи Ҳахоманишин то ба соли 632 комилан собитшуда аст. Яъне, тули 1200 соли воқеии маълумот - то зуҳури ислом - мардуми мо соҳиби Парчам буданд. Диравши Ковиён рамзи иттиҳод, рамзи шуҷоату далерӣ ва рамзи бедории миллӣ буд. Парчами серангаи Тоҷикистони соҳибистиқлол низ идомаи ҳамон Диравши Ковиён аст. Он рамзи истиқлоли давлат ва озодии мардуми мост. Бинобар ин, Парчами миллӣ яке аз муҳимтарин муқаддасоти миллии мост. Ҳар яки мо масъул ҳастем, ки баҳри болафшониву паравшонии Парчами миллиамон талош намоем.

Карина МИРЗОЕВА, узви дастаи мунтахаби футболи занонаи Тоҷикистон:

- Вақте зери парчами Тоҷикистон ба майдон мебароям, дар вуҷудам эҳсоси хосе пайдо мешавад. Бароям он танҳо рангҳо нестанд - он кишвари ман, хонаи ман ва миллати ман аст, ки дар ҳар бозӣ намояндагиашон мекунам. Парчам бароям ифтихор медиҳад.

Ҳар вақте парчамро дар либос ё болои майдон мебинам, ҳис мекунам, ки бояд намуна бошам, то лаҳзаи охир мубориза барам ва ба бозӣ эҳтиром гузорам. Парчам маро руҳбаланд месозад. Он ба ёдам меорад, ки чаро футболбоз шудаам. Он дар лаҳзаҳои душвор бароям неруи иловагӣ мебахшад ва ҳамеша кумак мекунад, ки аз ҳадафи худ даст накашам ва руҳафтода нашавам.

Моҳира ОДИНАЗОДА, корманди Кумитаи кор бо ҷавонон ва варзиши наҳди Ҳукумати Ҷумҳурии Тоҷикистон:

- Парчам рамзи ҳастиву ифтихори миллат аст. Он ҳар як фарди кишварро ба ваҳдат, дӯстӣ ва муҳофизати арзишҳои миллӣ даъват мекунад. Он танҳо як порчаи матоъ нест, он таърих, фарҳанг, шараф ва орзуҳои тамоми миллати тамаддунофари тоҷикро дар худ таҷассум мекунад ва ҳар яки моро мебояд, ки ба он арҷ гузорем. Ҳар гоҳ, ки бо ғолибияти варзишгарон менигарем, Парчами моро баланд мебардоранду Суруди миллии мо садо медиҳад, қалби ҳар як тоҷик аз ифтихор пур мегардад. Зеро дар рангҳои ӯ соҳиби миллати куҳанбунёд будани мо таҷассум ёфтааст.

Гулмуроди САЪДУЛЛО, довари дараҷаи байналмилалӣ оид ба футбол:

- Бо дидани парчами давлатӣ пеш аз ҳама ҳисси ифтихор маро фаро мегираду фахр мекунам, ки тоҷик ҳастам. Баъдан он яке аз муқаддасоти миллии мост. Ҳамзамон, нишон аз давлати соҳибистиқлол ва озод, ки таъриху тамаддуни куҳан дорад. Парчам барои ман мояи ғурур ва ифтихор аст. Он бароям бештар эҳсоси масъулиятро медиҳад. Масъулият дар назди давлату миллат, ҷомеа ва аҳли оила. Ман кӯшиш мекунам, ки масъулиятҳои худро ба дурустӣ иҷро намоям.

Ҳасан ОБИДЗОДА, ҳуқуқшинос:

- Эҳтиром ба парчам аз он лаҳза сар мезанад, ки инсон, пеш аз ҳама ҳувияти миллӣ, муқаддасоти миллӣ ва рамзи ягонаи давлату давлатдориро дарк мекунад. Парчам рамзи худи мост - рамзи соҳибватанӣ, рамзи иззати миллат ва рамзи рӯзгори ороме, ки имрӯз дорем.

Ҳангоми дидани Парчам мо на танҳо рангҳо, балки таърихи пурмасъулияти гузаштагон, орзуҳои наслҳои пешин ва масъулияти имрӯзаамонро эҳсос мекунем. Он нишонаи ҳастии давлату миллат мебошад. Яъне, қавме, ки парчам дорад, худшиносӣ ва ормонҳои муштарак дорад. Новобаста аз минтақа, забон, қавм ё эътиқод - ҳамаи мо зери як парчам муттаҳидем. Аз ин рӯ, эҳтиром ба парчами миллӣ эҳтиром ба худи миллат аст.

Муртазо НОСИРОВ, мураббии тими мунтахаби ҷудои Тоҷикистон:

- Барои як мураббӣ Парчами давлатӣ волотарин муқаддасот аст, зеро ҳама кӯшишҳои шабонарӯзии мо ҳамроҳи шогирдон танҳо ба хотири боло бардоштани парчаму садо додани Суруди миллиамон аст. Он барои ҳамаи мо азиз аст. Баробари барафрохта шуданаш маро эҳсоси хосе фаро мегирад, ки ногуфтанист. Парчами давлатӣ бароям эҳсоси ифтихор, масъулият ва неруро медиҳад.

Атригули АМОНУЛЛО, судяи Суди ноҳияи Ишкошим:

- Эҳтиром ба Парчами миллӣ пеш аз ҳама аз ҳисси худшиносии миллӣ, ифтихори давлатдорӣ ва шинохти арзишҳои таърихиву фарҳангии мо сарчашма мегирад. Парчам нишонаи истиқлолият, ваҳдат, сулҳу субот ва давлатдории миллӣ мебошад. Вақте мо ба парчам арҷ мегузорем, дар асл ба таърихи пуршарафи гузаштагон, дастовардҳои имрӯза ва ояндаи давлату миллат эҳтиром мегузорем. Муқаддасоти миллӣ, аз ҷумла парчам моро ба ваҳдат, масъулиятшиносӣ ва риояи қонунҳои кишвар раҳнамоӣ мекунад. Барои ҳар шаҳрванди сулҳдӯст ва ватандӯст арҷгузорӣ ба парчами миллӣ вазифаи муқаддас буда, ифодаи эҳтиром ба давлат, соҳибихтиёрӣ ва ормонҳои умумимиллӣ мебошад.

Ҷамшедҷон НУРЗОДА, муовини директори Литсейи касбии техникии нақлиётии автомобилии шаҳри Душанбе:

- Эҳтиром ба Парчам аз муҳаббат ба Ватан ва худогоҳии миллӣ сар мезанад. Ин рамз нишонаи истиқлол, ягонагӣ ва пояҳои давлатдорист. Арҷ гузоштан ба он дар асл, эҳтиром ба таърихи пурғановати миллӣ ва масъулияти ҳар як шаҳрванди тоҷик мебошад. Ҳар яки моро мебояд, ки арҷгузори ин муқаддасоти миллати худ бошем. Зеро ин рамз муҳаббат ва садоқати ҳар як шаҳрванди худогоҳ ба миллату давлати худро ифода мекунад.

Таҳияи Малика МУҚАДДАМОВА,
Гулафшон КАРИМОВА,
“ҶТ”