Дастаи мунтахаби наврасони Тоҷикистон (U-16) аввалин ғалабаи худро дар мусобиқаи қаҳрамонии Ассотсиатсияи футболи Осиёи Марказӣ (CAFA) ба даст овард. Мусобиқаи мазкур дар шаҳри Тошканди Узбекистон баргузор шуда истодааст.

Мунтахаби Тоҷикистон таҳти роҳбарии Далер Каёсов дар бозии аввали худ муқобили тими Туркманистон пирӯзӣ ба даст овард. Рақобати мазкур бо ҳисоби бузурги 4 бар 1 ба нафъи миллипушони мо анҷом ёфт. Ду голи аввали рақобатро аз ҳайати тими Тоҷикистон Парвиз Сангинов ба самар расонида, муаллифи дубл шуд. Муҳаммадҷон Мираҳмадов голи сеюмро ба ҳадаф расонид. Голи чаҳоруми тими мо ба таври худгол аз ҷониби туркманҳо ба дарвозаашон зада шуд. Ҳамакнун дар даври ниҳоии марҳилаи гурӯҳии мусобиқот дар гурӯҳи “В” мунтахаби наврасони Тоҷикистон (U-16) бо дастаи Афғонистон вомехӯрад. Ин рақобат 28 май баргузор мешавад.

Қайд кардан ба маври аст, ки мусобиқаи қаҳрамонии Ассотсиатсияи футболи Осиёи Марказӣ аз 24 то 31-уми май дар Тошканд баргузор мешавад. Дар чемпионати мазкур шаш дастаи минтақа - Тоҷикистон, Ӯзбекистон, Қирғизистон, Туркманистон, Эрон ва Афғонистон ширкат намуда истодаанд. Дастаҳо ба ду гурӯҳ ҷудо шудаанд. Дар марҳилаи гурӯҳӣ дастаҳо дар як давр бозӣ мекунанд. Ғолибони гурӯҳ дар финал вомехӯранд. Дастаҳое, ки дар гурӯҳҳо ҷойи дуюмро ишғол мекунанд, барои ҷойи сеюми мусобиқа мубориза мебаранд. Инчунин, бозии тасаллобахш барои ҷойҳои панҷум-шашум баргузор мешавад. Ҳамаи вохӯриҳои мусобиқа дар варзишгоҳи “Дӯстлик”-и Тошканд доир мешаванд.