Кумитаи рушди маҳали назди Президенти Ҷумҳурии Тоҷикистон супориши Ҳукумати кишварро оид ба ҳамкорӣ бо деҳаҳои Тоҷикистон дар заминаи номаи “Маркази Саэмаул Ундонти Ҷумҳурии Корея” роҷеъ ба тасмими ҷониби ташкилоти мазкур ҷиҳати амалисозии лоиҳа дар самти рушди деҳоти Ҷумҳурии Тоҷикистон давоми солҳои 2024-2028 мавриди корбарӣ қарор додааст.

Ин нуктаро Шарифҷон Ҷумъазода раиси кумитаи мазкур зимни нишасти хабарӣ баён намуд.

Гуфта шуд, ки айни замон ин лоиҳаи молиявӣ дар ҳамкорӣ бо ташкилоти “Маркази Саэмаул Ундонти Ҷумҳурии Корея” дар 4 деҳаи Ҷумҳурии Тоҷикистон (деҳаҳои Гулреза, Навбаҳор, Ҳаёти нав ва Файзбахш аз ҳудуди ноҳияи Шаҳринав) бо маблағгузории 440 ҳазор доллари амрикоӣ амалӣ гашта истодааст. Мақсад аз амалишавии лоиҳаи мазкур ин баланд бардоштани саҳми сокинони маҳаллаҳои пилотӣ дар рушди иҷтимоию иқтисодӣ ва беҳтар кардани инфрасохтори маҳалли зист арзёбӣ гардид.

Ҳамчунин, қайд гардид, ки татбиқи лоиҳаи Барномаи устуворгардонии шаҳри Хоруғ ба маблағи 104,3 млн. сомонӣ барои рушд, ободии маҳал ва дар ин замина бартараф кардани мушкилоти мавҷуда ба манфиати кор хоҳад буд.

Таъкид шуд, ки айни ҳол дар ҷумҳурӣ 428 ҷамоати шаҳраку деҳот, аз он 63 ҷамоати шаҳрак ва 365 ҷамоатҳои деҳот ба қайд гирифта шуда, аз 428 раисони ҷамоатҳои шаҳраку деҳот 407 нафарашон дорои маълумоти олӣ ва то синни 35-сола мебошанд.

Шаҳло ЭШОНОВА, “ҶТ”