Дар нимсолаи якуми соли ҷорӣ корхонаҳои нафтугазистеҳсолкунанда дар маҷмуъ зиёда аз 11 ҳазор тонна нафт истеҳсол намудаанд. Истихроҷи гази табиӣ бошад, дар ин давра 392,5 ҳазор метри кубиро ташкил додааст.

Вазири энергетика ва захираҳои об Усмонзода Усмоналӣ, 15 июл, зимни нишасти матбуотии ин ниҳод вобаста ба воридоти маҳсулоти  нафтӣ ва гази моеъ чунин иттилоъ дод: “Дар шаш моҳи соли 2019 аз ҳисоби соҳибкорон ва ҷамъиятҳои ватанӣ маҳсулоти  нафтӣ ва гази моеъ дар ҳаҷми  485368 тонна, аз ҷумла бензин зиёда аз 83 ҳазор тонна, сӯзишвории дизелӣ зиёда аз 115 ҳазор тонна, сӯзишвории реактивӣ зиёда аз 22 ҳазор тонна, мазуд зиёда 24 ҳазор тонна,  гази моеъ зиёда аз 207 ҳазор тонна ва дигар намуди маҳсулоти нафтӣ 486 тонна ворид карда шуд”.

Аз рӯи иттилои вазир воридоти маҳсулоти нафтӣ нисбат ба ҳамин давраи соли гузашта мутаносибан 29 ҳазор тонна ва гази моеъ 28 ҳазор тонна зиёд шудааст.