МУАЛЛИФ: ТОЛИБШОҲ ДАВЛАТ

Соли сипаришуда барои заҳматкашони шаҳри Ҳисор бобарор омад. Дар ин давра як қатор корхонаҳои нави саноатӣ ба фаъолият оғоз намуда, беш аз ҳазор нафар бо ҷойи кори доимӣ таъмин гардиданд. Дар ин давра корхонаҳои саноатии шаҳр ба андозаи 98,4 миллион сомонӣ маҳсулот истеҳсол ва коркард намуданд, ки нисбат ба ҳамин давраи соли 2015 27,8 миллион сомонӣ ё 30,7 фоиз зиёд аст.

Шарифҷон Ҷумазода, раиси шаҳри Ҳисор, дар нишасти матбуотӣ зикр кард, ки соҳаи асосии хоҷагии халқи Ҳисорро кишоварзӣ ташкил медиҳад. Соли гузашта ҳаҷми умумии истеҳсоли маҳсулоти кишоварзӣ 595 миллиону 866 сомониро ташкил дод. Ҳоло дар шаҳр майдони боғҳои меваҳои гуногун 634,4 гектарро ташкил медиҳад. Дар ҳудуди шаҳр барои нигоҳдорӣ ва захираи 5 ҳазор тонна меваю ангур ва сабзавот сардхонаҳо бунёд ёфтааст.

Баробари дастовардҳо дар соҳоти гуногуни хоҷагии халқи шаҳр ҳанӯз ҳам камбудиҳои зиёд ба чашм мерасад. Яке аз камбудиҳои мавҷуда, таъмирталаб будани роҳҳои байни деҳот ба ҳисоб меравад. Ш. Ҷумазода гуфт, як қисми роҳҳо аз таъмир бароварда шудааст, боқимонда мувофиқи имкон таъмир хоҳад шуд.