Озмуни ҷумҳуриявии “Илм – фурӯғи маърифат” баробари дигар озмунҳои ҷумҳуриявӣ дар байни ҷомеаи кишвар мақоми хоссаеро ба худ касб кардааст. Ин озмун бо ташаббус ва дастгириҳои бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баргузор гашта, ҳадаф аз он баланд бардоштани дониши ҷавонон ва пайдо кардани кадрҳои болаёқат мебошад.

21-уми августи соли 2004 дар яке аз хона-водаҳои деҳаи Симиганҷи шаҳри Ваҳдат духтаре шабеҳ ба номаш, ки ҳақиқатан рамзи зебоӣ, нафосат ва меҳрубонист, ба дунё омад. Он рӯз шодии хонаводаро ҳадду канор набуд. Падар ин азизи дилу дидаро бо садҳо орзу Гулҷаҳон ном гузошт, то дар оянда чун гул сафобахши дилҳо бошад.

Аз овони хурдӣ касби падар таваҷҷуҳи ӯро ба худ ҷалб кард. Зеро ӯ бо як ҷаҳон шавқу завқи зиёд ҳамарӯза роҳи мактабро пеш мегирифт, то ба шогирдон сабақи нав диҳад. Ин ҳама ба Гулҷаҳони хурдсол бетаъсир намонд ва боис шуд, ки ӯ аз хурдӣ ба фанни химия меҳр бандаду дар оянда муаллими фанни мазкур ва кадри босаводи химия гардад.

Ӯ гуфт: “Падарам доимо ба ман мегӯяд, ки омӯзгорӣ касбест пуршараф. Аз сабабе, ки падарам омӯзгор буданд, бароям имконияти хубе фароҳам оварданд, ки худро дар ин ҷода мустаҳкам намоям. Ба ин хотир мехоҳам тарбиятгари насли ояндаи кишвар ва аз ҷумлаи беҳтаринҳои пешаи худ дар оянда бошам”.

Дар давраи мактабхонӣ аз фанни мазкур яке аз пешқадамони синф ба ҳисоб мерафт ва устодони дигар ҳам донишманд будани ӯро пайваста ба падараш таъкид мекарданд. Ӯ пас аз хатми мактаб хост орзуи худро ба воқеият табдил диҳаду дониши хешро дар ин самт афзояд. Ин буд, ки соли 2021 ба Донишгоҳи давлатии омӯзгории Тоҷикистон ба номи Садриддин Айнӣ дохил шуда, айни ҳол дар риштаи химия таҳсил менамояд.

Ӯ ба тавсия ва роҳнамоии падараш гӯш дода, доимо пайи омӯзиш аст. Шавқи зиёдаш ба химия сабаб шуд, ки дар соли 2025 донишу маҳорати худро дар озмуни ҷумҳуриявии “Илм – фурӯғи маърифат” санҷад. Гулҷаҳон дар ҳама даврҳои озмун иштироки фаъол дошт ва бо хулосаи ҳайати доварон дар даври ниҳоӣ сазовори ҷойи сеюм аз рӯйи номинатсияи химия гашт.
- Дар озмуни мазкур рақобат хеле ҷиддӣ сурат гирифт ва рақибонам ҳама беҳтаринҳо буданд. Бо ифтихор мегӯям, ки миёни он ҳама иштирокчӣ яке аз ғолибони ин озмуни пуршӯкуҳ гаштам, - ёдрас шуд Гулҷаҳон.

Ӯ ҳамаи ин комёбиҳоро самараи саъйю талоши худ ва заҳматҳои шабонарӯзии устодон ва волидонаш медонад, ки барои комёбии ӯ кӯшиш карданд.

- Сипоси бепоёни худро ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мерасонам, ки ҳамеша дар фикри ҷавононанд ва ба мо имконият медиҳанд, ки донишҳои худ-ро дар самтҳои гуногун санҷем, - афзуд номбурда.

Ба гуфтаи Гулҷаҳон, барои чизеро ба даст овардан, бояд заҳмат кашид, талош кард, то ба хостаҳои хеш расид.

- Номинатсияи химия аз се шарт иборат буд ва дар натиҷаи заҳматҳои шабонарӯзӣ ва омодагии хуб тавонистам сазовори ҷоизаи ин озмун гардам. Озмуни мазкур бароям мактаби бузурге буд, ки тавонистам тавассути он худро муаррифӣ намоям, – баён дошт ӯ.

Ӯ мехоҳад дар оянда ҳамчун як кадри содиқ ва фаъол дар рушду нумуи ватани азизамон саҳмгузор бошад.

- Аз маблағи бадастовардаи озмун қисмеро барои сайқал додани донишҳои хеш харҷ кардам. Мехоҳам оянда дар соҳаи илми химия ҷойгоҳи худро пайдо намуда, ҳамчун матахассис дар ин самт фаъолиятамро содиқона анҷом диҳам, - гуфт дар охири суҳбат Гулҷаҳон.

Сафиаллоҳ ИБОДЗОДА, “ҶТ”