24 август дар доираи сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ноҳияи Рашт дар деҳаи Бедаки ҷамоати деҳоти Навдӣ толори муосири варзишӣ буднёд гардида, мавриди истифодаи умум қарор гирифт.

Дар маросими ифтитоҳи расмии иншооти мазкур Раиси Маҷлиси намояндагони Маҷлиси Олии Ҷумҳурии Тоҷикистон муҳтарам Идизода Файзалӣ Фузайлшо, намояндаи ваколатдори Ҳукумати Ҷумҳурии Тоҷикистон, директори Агентии захираҳои моддии молии назди Ҳукумати Ҷумҳурии Тоҷикистон Аҳмадзода Нурмуҳаммад Ато, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шокирзода Муҳаммадтолиб ва раиси ноҳияи Рашт Идизода Заррина иштирок ва суханронӣ намуда, оид ба дастгириву ҳидоятҳои Пешвои муаззами миллат муҳтарам Эмомалӣ Раҳмон нисбат ба ин соҳаи муҳими иҷтимоии кишвар ёдоварӣ намуданд.

Инчунин, давоми рӯзи 24 август дар деҳаи Кулобаи ҷамоати деҳоти Қалъаи Сурх ва 25 август бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар деҳаи Навободи ҷамоати деҳоти Лангари Шоҳ майдончаҳои муосири варзишӣ бунёд гардида, мавриди истифодаи умум қарор гирифтанд.

Боиси тазаккур аст, ки иншооти мазкур бо ибтикороти ҷавонони маҳал бунёд гардида, дар арафаи таҷлили ҷашни Истиқлоли давлатӣ туҳфаи беназир ҳисоб меёбад.