Дар Ҷумҳурии Тоҷикистон дар асоси тағйиру иловаҳо ба лоиҳаи Қонун “Дар бораи танзими ҷашну маросим дар Ҷумҳурии Тоҷикистон” идгардак манъ карда шуд.

Дар ин бора нашрияи расмии “Садои мардум” иттилоъ медиҳад.

Тибқи иттилои манбаъ, дар моддаи 9-и лоиҳа меъёрҳои марбут ба ҷашн¬ҳои расмӣ такмил дода шуда, дигар кӯдакон дар Иди Рамазон ва Қурбон ид намекунанд.

- Бо мақсади тарбияи дурусти кӯдакон ва таъмини бехатарии онҳо дар рӯзҳои Иди Рамазон ва Иди Қурбон исрофкорӣ, зиёдаравӣ, тақдими ширинӣ ва туҳфаҳои дигар (идгардак) манъ карда шуд. Бояд қайд кард, ки дар кишварҳои дигар низ идгардак дар шакли мавҷуда ба мушоҳида намерасад,-омадааст дар хабар.

Инчунин дар лоиҳа мафҳуми “маросимҳо” ба “маросим”, ки худ шакли ҷамъ аст, иваз карда, мафҳуми “анъана” хориҷ карда шуд, зеро дар матн муқаррароти марбут ба он пешбинӣ нашудааст. Қонун дигар “Дар бораи танзими ҷашну маросим дар Ҷумҳурии Тоҷикистон” ном бурда мешавад.

Гуфта мешавад, ки лоиҳаи қонуни мазкур бо мақсади татбиқи сиёсати давлатӣ дар соҳаи танзими ҷашну маросим ва баҳри беҳтар гардидани шароити иҷтимоӣ ва вазъи оилавии шаҳрвандон таҳия шудааст.

Бояд гуфт, ки баҳси аз байн бурдани идгардак дар Тоҷикистон ҳанӯз аз соли 2017 вуҷуд дошт. Ҳамон замон идораҳои динии Тоҷикистон мухолифи исрофкорӣ ва идгардак изҳори назар карда буданд. Шурои уламои маркази исломии Тоҷикистон изҳор дошта буд, ки расми идгардак дар ҳадисҳои динӣ зикр нашуда, гузашта аз ин, барои кӯдакон хатарнок ҳам ҳаст.

Фарзонаи УМАРАЛӢ, “ҶТ”