17 - уми сентябр раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад бо ҳамроҳии сардори Раёсати кор бо ҷавонон ва варзиши вилояти Суғд Исматзода Бахтиёр ва дигар масъулини соҳа дар вилоят аз рафти баргузории мусобиқаи вилоятӣ оид ба футбол байни наврасон, ки дар майдони Муассисаи давлатии “Мактаби махсуси варзишӣ оид ба футбол” доир гардид, дидан намуданд.

Раиси Кумита бо варзишгарон ва масъулони соҳа суҳбат анҷом дода, ба фаъолияти мактаб ва омодагии дастаҳои наврасон баҳои мусбат дод. Ҳамчунин, оид ба рушди минбаъдаи футбол дар сатҳи вилоят ва фароҳам овардани шароити мусоид барои наврасон таъкид гардид.

Зикр шуд, ки рушди футбол миёни наврасон заминаи устувори тарбияи варзишгарони касбӣ ва муаррифгарони шоистаи Тоҷикистони соҳибистиқлол дар арсаи ҷаҳонӣ мебошад.

“ҶТ”