Чанде пеш дар Мамнӯъгоҳи давлатии табиии "Даштиҷум" фестивали байналмилалии "Морхӯр-2025" ташкил ва гузаронида шуд.

Дар ин бора зимни нишасти матбуотии Кумитаи ҳифзи муҳити зисти назди Ҳукумати Ҷумҳурии Тоҷикистон 25 июли соли равон хабар дода шуд.

Тавре раиси Кумитаи мазкур Баҳодур Шерализода иброз дошт, ҳадаф аз баргузории ин чорабинӣ баланд бардоштани сатҳи огаҳии ҷомеа оид ба ҳифзи табиат, нигаҳдории намудҳои нодири ҳайвонот, густариши ҳамкориҳои байналмилалӣ ва муаррифии мероси фарҳангиву кишоварзии минтақа мебошад.

Гуфта шуд, ки пешниҳоди Пешвои миллат муҳтарам Эмомалӣ Раҳмон оид ба эълон намудани 24 май ҳамчун "Рӯзи байналмилалии морхӯр" аз ҷониби СММ пазируфта шуда, барқарор намудани гуногунии биологӣ ва ҳифзу нигаҳдории ҳудуди паҳншавии морхӯр (бузи пармашох) ҳамчун зарурати экологӣ эътироф карда шуд.

Ш. ЭШОНОВА, “ҶТ”