Шумораи гузашта дар матлаби “Бӯҳрони Венесуэла” гуфтем, ки роҳбари мухолифин - Хуан Гуайдоро ҷонибдорӣ кардани ИМА ба хотири дур кардани таваҷҷуҳи ҷомеаи амрикоӣ аз ҷанҷолҳои дохилист. Кадоманд онҳо? Дар ин шумора каме аз он хусус ёдовар мешавем.

Бояд гуфт, дар рафти маъракаҳои интихоботиаш Доналд Трампро яке аз афсарони собиқи амрикоӣ Майкл Флин, дастгирӣ карда буд, ки баъдтар номи ӯ дар сархати ахбори расонаҳои амрикоӣ қарор гирифт. Ӯро бо он айбдор карданд, ки бо намояндагони Федератсияи Русия рафтуомаду мулоқотҳо доштааст. Воқеан, пас аз интихоботи президентии соли 2016 дар ИМА Майкл Флин ба вазифаи мушовири амнияти миллии ИМА таъин гардид. Ин вақт Доналд Трамп аллакай расман президенти ИМА буд. Гуфта мешавад, ки М. Флин пас аз интихоботи президентӣ бо сафири Федератсияи Русия дар Вашингтон Сергей Кисляк доир ба масъалаи таҳримоти Ғарб алайҳи Русия мулоқот намуда, ваъда додааст, ки барои бардошта шудани таҳримҳо мусоидат мекунад. Дар робита ба ин мулоқоташ М. Флин аз тарафи Бюрои федеролии ИМА (FBI) мавриди пурсуҷӯ қарор мегирад. Баъдан вақте ки маълум мешавад, номбурда зимни пурсиш ба кормандони Бюрои федеролӣ дурӯғ гуфтааст, аз мақомаш истеъфо медиҳад.

Фаъолияти Майкл Флин дар мақоми мушовири амнияти миллии ҳукумати Доналд Трамп ҳамагӣ 24 рӯз идома дошт. Сипас, ӯ ба хотири ҷазои сабук гирифтанаш дар рафти мурофиаҳо қарордод имзо мекунад, ки ҳар чи медонад, баён хоҳад кард. Собиқ мушовир қарордодашро бо Мюллер ном судя ба имзо расондааст, ки ӯ низ яке аз нафарони наздик ба Д. Трамп номида мешавад.

Ӯ дар мусоҳиба бо хабарнигори “The Washington Post” Дане Прист аз ҳамкориҳояш ба Федератсияи Русия ёдовар шуда чунин гуфтааст:

“Ман ҳамагӣ як маротиба ба сифати корманди низомӣ ба Русия сафар доштам. Сафари хубе ҳам буд. Аввалин афсари амрикоӣ маҳсуб мешавам, ки ба ситоди Ташкилоти асосии иктишофии Русия (ГРУ) иҷозати вуруд пайдо кардаам. Дар он сафар бо кормандони он ниҳод брифинге ҳам доштам. Ба онҳо дар бораи рушди касбии малакаҳои роҳбарӣ ва дар бораи махсусиятҳои ҷаҳони таҳаввулпазир суҳбат намудам”.

Бино ба андешаи М. Флин бисёриҳо мегӯянд, ки сардии муносибати ИМА ва Русия аз боиси вазъияти Украина аст. Аниқтараш бо сабаби дахолати Русия ба корҳои дохилии Украина, лек ин тавр нест. Мо бо Русия дар масъалаҳои сатҳи байналмилалӣ ҳамкориҳо дорем. Масаслан, дар хусуси барномаи атомии Эрон...

М. Флинн дар суҳбат ба хабарнигори “The Washington Post” мегӯяд, ман ба он назарам, ки робитаи хуб доштани ИМА бо Русия ба ИМА зарур аст.

Аммо ҳоло ӯ бо он айбдор мешавад, ки бо намояндаи Русия масъалаи таҳримро ба миён гузошта суҳбат кардааст ва дар ин бора маълумоти носаҳеҳ ҳам додааст. Ин моҷаро то Доналд Трамп ҳам рафтанаш аз эҳтимол дур нест ва аз ин ҷост, ки Трамп мехоҳад ин масъала ҳар чи зудтар фаромӯш шавад. Ин буд, ки соли гузашта дар як паёмаш изҳор дошт, ки Чину Русия рақибоне мебошанд, ки бояд ба онҳо бо “нерӯи беҳамто” муқовимат кард.

Илова бар ин дар сатҳи байналмилалӣ баъзе тасмимҳое мегирад, то тавонад таваҷҷуҳро ба дигар самт равона созад. Чунончи эътирофи Байтулмуқаддас, изҳор доштани он ки низомиёни ИМА-ро аз Ховари Миёна берун меорад, таваҷҷуҳ ба буҳрони сиёсии Сурия ва ғ.

Ба андешаи таҳлилгарон дар ин раванд ҳатто талоши тобеъ гардонидани судҳо ба президент ҳам ба назар мерасад. Ин бошад ба хотири он аст, ки пахшу хомӯш кардани баъзе даъвоҳои пурсарусадо, мурофиаҳои сатҳи баланд имконпазир гардад. Вале бояд гуфт, системаи судии ИМА мустақилияти хос дошта, адолати судӣ дар ин кишвар ҷорист. Сарфи назар аз он ки маҳкуммшаванда, айбдор ё ҷинояткор кист назди қонун ҷавобгар аст. Қудрати ҳамин маҳкамаву адолати судист, ки М. Флин ҳамагӣ 24 рӯз мушовири давлатии амнияти миллии Қасри Сафед фаъолият карда тавонисту ҳоло барои кирдораш ҷавоб мегӯяд. Ҳарчанд ки дар гузашта як низомии баландмартаба буд...