Имрӯз, 31 январ дар маркази маъмурию фарҳангии Вилояти Мухтори Кӯҳистони Бадахшон - шаҳри Хоруғ ҷашни Сада бо риояи расму русуми аҷдодӣ таҷлил карда шуд.

Ба ин муносибат дар майдони Исмоили Сомонӣ намоиши дастовардҳои аҳли заҳмат, аз ҷумла кишоварзону ҳунармандон ташкил гардида, гулхан, ки рамзи таърихии ҷашни Сада мебошад, афрӯхта шуд.

Баъди боздид аз намоиши маҳсулоти кишоварзӣ ва ҳунармандӣ, раиси ВМКБ Мирзонабот Алишер Худобердӣ ҳозиринро ба муносибати ҷашни Сада шодбош гуфт.

Зикр гардид, ҷашни Сада яке аз ҷашнҳои қадимаи мардуми ориёитабори мо ба шумор рафта, моҳияти он пирӯзии рушноӣ бар торикӣ, гармо бар сармо ва некӣ бар бадӣ маънидод гардида, мардум онро бо афрӯхтани гулханҳои бузург таҷлил мекунанд.
Боиси сарфарозист, ки имрӯз ба шарофати соҳибистиқлолии кишвар ва сиёсати пешгирифтаи Ҳукумати Ҷумҳурии Тоҷикистон дар ҳамаи манотиқи ҷумҳурӣ ин ҷашн ҳамасола ҷолибу рангин ва пуршукӯҳ таҷлил мегардад.

Тавре Пешвои миллат муҳтарам Эмомалӣ Раҳмон иброз намуданд: “Боварӣ дорам, ки эҳёву таҷлили ҷашни Сада ҳамчун рамзи истиқболи фасли нуру гармӣ, некиву саховатмандӣ, сарҷамъӣ ва ваҳдати кулли шаҳрвандон дар густариши корҳои ободониву созандагӣ ва хуррамиву пешрафти Тоҷикистони азизамон нақши муассир гузошта, дар оғози сол чун паёмовари Наврӯзи оламафрӯз ба зиндагии мардуми шарифи Тоҷикистон муждаи хуррамиву хушбахтӣ хоҳад овард.

- Умед дорем, ки ҷашни Сада низ ба сифати як ҷашни миллию мардумӣ натанҳо барои дилхушиву зиёфат баргузор гардад, балки мададгори кишоварзон шуда, барои рушди боғдориву чорводорӣ, зироаткориву гулпарварӣ, дар маҷмуъ ба ободкорӣ мусоидат намуда, минбаъд боз ҳам густариш ёбад, - афзуд раиси вилоят.

Дар идома чорабинии хотирмони фарҳангӣ аз ҷониби ҳунармандон манзур гардид.

Садоншо ҶАНОБИЛШОЕВ, “ҶТ”