Дар шаш моҳи аввали соли ҷорӣ дар самти қонунвайронкунии замин нисбати 670 нафар парвандаҳои ҷиноятӣ оғоз гардидааст, ки аз ин шумора 124 нафарашонро мансабдорон ташкил медиҳанд.

Ин нукта 9 август дар нишасти Прокуратураи генералии Ҷумҳурии Тоҷикистон гуфта шуд.

Юсуф Раҳмон, прокурори генералии кишвар гуфт, инчунин дар ин самт 2990 амру пешниҳод, 1500 эътироз оварда шуда, 83 га қитъаи замин ба ҳолати аввала баргардонида шуд.

Ҳамзамон, Юсуф Раҳмон зикр кард, ки дар шашмоҳаи аввали соли ҷорӣ, инчунин, 4970 нафар ба ҷавобгариҳои гуногун кашида шуда, 2,5 млн. сомонӣ маблағи зарар барқарор карда шудааст.

Гуфта шуд, ки масъалаи қонунвайронкунӣ дар самти замин қаблан ташвишовар буд. Аммо аз солҳои 2020-2024 ин вазъияти ташвишовар ба эътидол дароварда шуда, айни замон дар ин самт Прокуратураи генералӣ чораҳои заруриро меандешад.