Дар назди Агентии инноватсия ва технологияҳои рақамии назди Президенти Ҷумҳурии Тоҷикистон ҷиҳати ҳифзи маълумоти корбарони интернет як маркази нав - Муассисаи давлатии “Маркази ҳифзи маълумот” таъсис дода шуд.

Дар ин хусус имрӯз 16 июл Ҳаким Исмоилзод муовини якуми директори Агентии инноватсия ва технологияҳои рақамии назди Президенти Ҷумҳурии Тоҷикистон зимни нишасти матбуотӣ иттилоъ дод.

Бино ба гуфтаи Исмоилзода фаъолияти марказ ба мустаҳкамкунии амнияти киберӣ ва ҳифзи иттилоот дар низомҳои давлатӣ ва махзанҳои коркарди маълумот равона гардида, назорати ҳамаҷонибаи раванди ҷамъоварӣ, коркард, истифода, паҳнкунии маълумот ва татбиқи механизмҳои ҳифзи барномавӣ, бо истиснои маълумотҳои дорои сирри давлатӣ амалӣ карда мешавад.

Масъулин таъкид намуданд, ин иқдом барои баланд бардоштани эътимоднокӣ ва устувории низомҳои иттилоотӣ мусоидат мекунад.

Шаҳноза АЗИМОВА, “ҶТ”