Дар вилояти Хатлон бахшида ба Рӯзи варзишгарони Тоҷикистон ҷаласаи тантанавӣ баргузор гардид.

Дар ин бора Раёсати кор бо ҷавонон ва варзиши вилояти Хатлон хабар дод.

Бино ба иттилои манбаъ, ҷаласаи мазкурро муовини раиси вилояти Хатлон Анзурат Абдусаломзода оғоз намуда, дастовардҳои варзишгарони кишварро дар Бозиҳои олимпии Париж-2024 аз таваҷҷуҳ ва дастгириҳои Пешвои миллат муҳтарам Эмомалӣ Раҳмон маънидод намуд.

Номбурда зикр кард, ки дар заминаи сиёсати некбинонаи давлату Ҳукумати кишвар бо дастгириҳои мақомоти иҷроияи ҳокимияти давлатии вилояти Хатлон дар давоми шаш моҳ дар вилоят 13 майдончаи варзишӣ, 2 толори варзишӣ ва 1 ҳавзи шиноварӣ сохта ба истифода дода шуд, ки наврасону ҷавонон аз онҳо истифода менамоянд.

Ҳамзамон, ӯ баён дошт, ки ин иқдомҳои созанда дар шаҳру ноҳияҳои вилоят идома дошта, то истиқбол аз ҷашни 35-солагии Истиқлоли давлатии Ҷумҳурии Тоҷикистон зиёда аз 200 иншооти варзишӣ ба истифода дода мешавад.