Имрӯз дар Кохи "Наврӯз" - и пойтахт форуми байналмилалии "Занон ва об" дар доираи Конфронси сеюми байналмилалии сатҳи баланд оид ба даҳсолаи байналмилалии амал "Об барои рушди устувор, солҳои 2018-2028" бо ҳамоҳангсозии Кумитаи кор бо занон ва оилаи назди Ҳукумати Ҷумҳурии Тоҷикистон дар ҳамкорӣ бо Маркази минтақавии СММ оид ба дипломатияи пешгирикунанда барои Осиёи Марказӣ, Агентии ИМА оид ба ҳамкории байналмилалӣ (USAID), Бонки Осиёгии Рушд, Институти тафсири ҷанг ва сулҳ (IWPR), Агентӣ оид ба ҳамкории техникӣ ва рушд (АСТЕД), коршиносони миллӣ ва байналмилалӣ баргузор гардида истодааст.

Дар форуми мазкур Дилрабо Мансурӣ, муовини Сарвазири Ҷумҳурии Тоҷикистон, Мавсума Муинӣ, муовини Раиси Маҷлиси намояндагони Маҷлиси Олии Ҷумҳурии Тоҷикистон ва Бунафша Файзиддинзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон иштирок ва суханронӣ намуданд.

Ҳамчунин, дар кори форум аз 27 давлати ҷаҳон - доираи васеи намояндагони ташкилотҳои байналмилалӣ ва ҷамъиятӣ, коршиносони соҳаҳои гуногун, аз ҷумла, сиёсатмадорон, олимон, роҳбарон ва намояндагони сохторҳои давлатӣ ва ҷомеаи шаҳрвандии Тоҷикистон, фаъолон ва ҳимоятгарони ҳуқуқи занон, шарикони рушд, сармоягузорон ва дигар ҷонибҳои манфиатдор, ки фаъолияти онҳо ба ҷанбаҳо ва равандҳои гендерӣ равона гардидааст, иштирок доранд.

Форум барои дар амал татбиқ намудани мақсад ва вазифаҳои шашуми Ҳадафҳои рушди устувор ва Даҳсолаи амал "Об барои рушди устувор" равона гардидааст.

Ҳадаф аз баргузории форуми мазкур таъсис додани платформаи байналмилалӣ барои баррасии нақши муҳими занон дар идоракунии захираҳои обӣ ва таъмини баробарии гендерӣ дар соҳаи муносибатҳои баҳрӣ низ маънидод мегардад.

Гулафшон КАРИМОВА, "ҶТ"