10 – уми июн бо мақсади таъмини оммавияти варзиш, таҳкими тарзи ҳаёти солим ва дарёфти чеҳраҳои нави варзиш, омодакунии варзишгарони касбии кишвар ҷиҳати иштирок дар мусобиқаҳои бонуфузи сатҳи байналмилалӣ дар шаҳри Душанбе ҷаласаи гурӯҳи кории дохилиидоравӣ ҷиҳати тайёрии зарурӣ ва иштироки муваффақонаи варзишгарон дар Бозиҳои Осиёии “Айчи Нагоя - 2026” ва Бозиҳои олимпии “Лос – Анҷелес - 2028” доир шуд.

Дар ин бора аз маркази таҳлил ва иттилооти Кумитаи кор бо ҷавонон ва варзиши назди Ҳукумати кишвар хабар доданд.

Тибқи иттилоъ, ҷаласа таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноиби аввали Президенти Кумитаи миллии олимпии Тоҷикистон доир шуда, дар он масъулини Кумитаи кор бо ҷавонон ва варзиши кишвар, Кумитаи миллии олимпии Тоҷикистон, муассисаҳои ҷумҳуриявии варзишӣ, федератсияҳои варзишӣ ва сармураббиёни намудҳои афзалиятноки варзиши мамлакат иштирок намуданд.

Мувофиқи рӯзномаи ҷаласа зимни он се масъала, якум ба имзо расонидани шартномаи сеҷониба оид ба омодагии ҳаматарафа ба Бозиҳои олимпии “Лос – Анҷелес - 2028” бо ба инобат гирифтани нақшаи маблағгузорӣ, дуюм муайян намудани аъзои дастаи мунтахаб аз рӯи намудҳои афзалиятноку эътирофшудаи варзиш ва таъмини иштироки бомуваффақияти онҳо дар мусобиқаҳои байналмилалии тақвимиву рейтингӣ ва дар доираи масъалаи сеюми рӯзномаи ҷаласа як зумра масъалаҳои ҷорӣ доир ба рушди минбаъдаи соҳаи тарбияи ҷисмонӣ ва варзиши кишвар ва инчунин омодагиҳои дастаҳои мунтахаби мамлакат ба Бозиҳои Осиёӣ ва Бозиҳои олимпӣ мавриди баррасӣ ва муҳокима қарор гирифт.

Сипас, доир ба масъалаҳои рӯзномаи ҷаласа иштирокчиён мулоҳизаронӣ намуда, дар фарҷом қарорҳои дахлдор қабул гардид.