Имрӯз бо ташаббуси Мақомоти иҷроияи ҳокимияти давлатии шаҳри Душанбе бо мақсади дар сатҳи баланд таҷлил намудани Рӯзи пойтахти Ҷумҳурии Тоҷикистон - шаҳри Душанбе, инчунин рушду тавсеаи соҳаи сайёҳӣ, муаррифии иқтидори сайёҳии пойтахти кишвар ва дар заминаи ҷалби бештари сайёҳони дохиливу хориҷӣ ба Душанбешаҳр дар Муассисаи давлатии “Майдони истиқлол” намоиши аксҳои Душанбе ва пресс-тур доир гардид.

Дар чорабинӣ роҳбарияти Мақомоти иҷроияи ҳокимияти давлатии шаҳри Душанбе, Кумитаи рушди сайёҳии назди Ҳукумати Ҷумҳурии Тоҷикистон ва Иттифоқи журналистони Тоҷикистон иштирок ва суханронӣ намуданд.

Қайд гардид, ки ин ҳама пешравиҳои рӯзафзун ва рушду тараққиёти пойтахти мамлакат маҳз ба туфайли Истиқлоли давлатӣ, ваҳдати миллӣ, сулҳи саросарӣ ва амнияту рӯйи кор омада, умеди мардумро ба ояндаи дурахшони давлати соҳибистиқлол беш аз пеш афзун менамояд.

Гуфта шуд, ки пойтахт ин муаррификунандаи давлату миллат дар арсаи ҷаҳонӣ буда, барои бегазанду беолоиш нигоҳ доштан ва ба оламиён ба таври шоиста шинос кардани он кормандони мақомоти давлативу ниҳодҳои ҷомеаи шаҳрвандӣ ва ҳар сокини ватандӯсти мамлакат вазифадору масъул мебошад. Амалҳои бунёдкорӣ ва созандагӣ моро водор месозад, ки ба қадри Истиқлоли давлатӣ, сулҳу суботи сартосарӣ бирасем ва дар татбиқи сиёсати пешгирифтаи Пешвои миллат муҳтарам Эмомалӣ Раҳмон ва иқдоми наҷибонаи раиси шаҳри Душанбе муҳтарам Рустами Эмомалӣ саҳми назаррас гузорем.

Дар рафти намоиш аз ҷониби роҳбаладон аксҳои ба намоишгузошташуда, ки манзараҳои дилфиреб, мавзеъҳои сайёҳӣ ва таърихии пойтахтро инъикос мекунанд, муаррифӣ гардид.

Инчунин, дар доираи намоишгоҳ хатсайри сайёҳии дохилишаҳрӣ барои намояндагони воситаҳои ахбори омма роҳандозӣ гардид, ки зимни он иштирокчиён аз маконҳои таърихиву фарҳангӣ ва сайёҳии пойтахти азизамон дидан намуданд.

Бояд қайд намуд, ки намоиш то 19 апрел идома ёфта, аз он тамоми сайёҳону сокинон ва меҳмонони пойтахт метавонанд дидан намоянд.

Малика МУҚАДАМОВА, “ҶТ”